少女旅行日記

台灣花蓮 | 台灣後花園 人情味濃厚的慢活小世界 花蓮景點一覽(下)

上集:LINK 
繼續介紹花蓮好去處~

食好西盡在中正路
上篇有說過花蓮最熱鬧的是中正路,連帶附近的橫街,這算是花蓮的市區,食的買的大多在這裡。我幾乎隔幾天就來一次找好吃的。但我都掛住食冇點影相......以下是必食的推介:
鵝肉先生-鵝肉必點,肉質嫩滑,個醬都好正!
周家蒸餃-小籠包幾大粒,好好食!
一碗小-日式風味小店,牛肉麵好味!
西瓜大王-鮮柞果汁好足料好好飲!特別推介西瓜汁和西瓜牛奶。
蔡記豆花-甜品店,特別推介薏仁牛幼,好滑,好養顏。
藝文青小店 精緻手信天堂阿之寶
在中正路附近的中山路有一間3層高的藝文青小店,叫阿之寶,好推介大家來逛。阿之寶3層各有唔同名,1樓玩味館、2樓手創館、3樓瘋茶館,賣不同的東西,等我介紹一下啦。
1樓玩味館是膠紙控天堂,成層都賣各式各樣的膠紙,我從未見過一個地方集中賣甘多膠紙,好多都好靚,岩曬鍾意做DIY同儲膠紙的少女!另外仲有一個角落賣台灣醬料和調味品,愛煮食的可能會滿載而歸啊。
2樓手創館主要賣手信、藝術品同有台灣特色的精品,賣的東西都很有台灣本土風格,因為很多都是本地設計師創作的作品。例如明信片不是一般的風景相,是手繪印刷,以花蓮日式建築做主題的。還有木刻吊飾、手造肥皂、用著名建築物的牆紙花紋做設計的杯墊、鉛字印章、茶具等等,用來做手信特別有心思!
3樓瘋茶館是餐廳,我沒有食過,但環境氣氛很寫意,是cafe格局。
我是一隻小小鳥 磯崎必玩空中飛行傘
花蓮最刺激好玩的一定係飛行傘啦!我都唔知自己當時哪來的勇氣,因為我本身係完全唔敢玩機動遊戲,我都唔明點解當時會夠膽係個天上面飛!!!但真的好慶幸有勇氣玩,真的是好難忘的體驗!
玩飛行傘的地方叫磯崎,離市中心要個幾鐘車程,通常係透過民宿報名,教練會去到民宿門口接送,台幣$2500包交通接送、可以飛10-15分鐘同有保險。可以話非常非常平,因為無論香港定外國,玩飛行傘都應該最少港幣$1000以上,甚至$2000都有可能,但花蓮只係$625,所以好推介!磯崎環境非常優美,個海好靚,呢度玩飛行傘可以見到山又見到海。
起飛點就係呢個山啦!個山有430米高,其實起飛前真係好驚,不過上到黎都冇得淆底,著好曬安全裝備,同教練影張起飛前合照,就要一氣呵成對住山邊跑跑跑,跑左十步左右就突然會雙腳離地,飛啦!!!
係天空上真係幾冇安全感,始終唔可以腳踏實地,雙腳fingfing下......但其實成個飛行過程都好穩定,有時會有風同少少氣流,不過都係輕輕郁少少,唔會有離心力,唔駛驚。從天空上睇山睇海真係好靚,個海仲有唔同層次的顏色,好正!!!一路飛,教練仲同我講解下腳下風景、風的動向、飛行故事,原來教練已經飛左好多好多年,仲曾經代表台灣去中國表演同比賽添!臨落地之前,教練仲同我來個360度海上大迴環,呢下真係有離心力,嚇到大叫但真係好正,在空中俾山同海包圍的感覺真係一世難忘架!!所以鼓勵大家挑戰自己試下做雀仔的感覺!哈哈~想要教練的聯絡資料可以pm我。
花蓮另一皇牌景點 太魯閣國家公園
除了上集介紹的七星潭外,太魯閣都是另一個花蓮地標及皇牌景點,又是那種「你冇去過太魯閣唔好話自己黎過花蓮」的景點。太魯閣其實是一個行山看峽谷的國家公園,有多座高山,好似話有30條以上行山路線,面積極廣,一日大概只會行到其中3-4條路線。
我是參加一日團來的,盛惠台幣$700,即港幣$175,整個行程大約8個鐘,包交通接送。太魯閣行程包括長春祠、燕子口步道、綠水步道同白楊步道,應該算是太魯閣裡較出名的景點/路線。
這次去太魯閣風景不太美,跟天氣有一點關係,因為我去之前花蓮下了好多天雨,溪水都變成泥水,風景大打折扣,所以下次要在天氣好的時候再來!
額外加送 清水斷崖
為什麼說額外加送呢?因為清水斷崖是太魯閣一日團的附加景點,在太魯閣附近,好像都屬於公園範圍。特別在於懸崖下是很壯闊的太平洋,海水超藍,景色很不錯!但好像是10分鐘景點,即是看10分鐘就可以走了......
花蓮我仲有好多地方未去啊,所以一定會再來!!最後想同大家講,花蓮係一個經常地震的地方,聽day tour個導遊講,一年會有超過200次有感覺冇感覺的地震......但唔需要太驚慌,因為大多數都係小地震,花蓮人都習慣左,地震對佢地黎講好小事,地震時佢地反應非常冷淡,如果作為遊客黎幾日都竟然會遇到地震,直頭係難得體驗。而少女都有幸遇過,係民宿準備洗衫時世界大力搖晃左一下,要搵野扶一扶。事後睇新聞原來係強度達5級,雖然真係有嚇親,不過安全的地震真係花蓮獨特的難忘體驗呀。最好笑係你見到同場其他花蓮人若無其事,淡淡然話:「哦,地震。我覺得還好,沒很刺激。」

更多花蓮相關文章

更多台灣相關文章