台東最吸引的風景一定係海景，面向太平洋的台東，由市中心出發沿住海岸玩，沿途有好多可以停靠的景點，雖然都係睇海睇海，但每個景點都有獨特之處，最好可以自駕遊，或者包車，因為台東交通唔方便，公車班次好疏落。

先睇睇呢幅地圖，路線由最遠的三仙台開始玩返轉頭，接住係成功鎮，再去杉原海水浴場，最後去埋小野柳就返市中心。如果想一日去曬都可以，好早出發，黃昏過後再返市中心。我當時係超悠閒mode ，所以分開兩日去。（地圖圖片來源：東部海岸國家風景區旅遊服務網）

第一站係三仙台，由珊瑚礁海岸構成，有好多自然奇觀，包括受風化同海水侵蝕而形成好多造型奇特的岩石、海蝕地形，對地質生態有興趣的可以黎睇下。三仙台有個地標，就係一個波浪型的跨海步橋，連接對面的離岸小島，可以行上去過橋到對面的小島欣賞海景，但好可惜我去個日條橋維修中，所以就冇得上去。三仙頭個石灘好靚，有好多唔同顏色、形狀的石頭，都可以落水玩，水好清好乾淨。聽講呢度日出景色都好靚，仲係2015年1月1號台灣迎接第一個日出的地方添。

離開三仙台，去到附近位於成功鎮三仙社區一個濱海小部落，叫比西里岸。呢度有個幾米園區，周圍有好多幾米的壁畫同公仔，好可愛啊！

另外以前住比西里岸的阿美族人養羊維生，所以呢度都有好多大大小小的木雕羊。呢度感覺好有童真，海岸風景又靚，我最鍾意就係呢度啦。

第三站去到杉原海水浴場，呢個地方特別之處係可以買麵包落水餵魚，水清沙幼，可以清楚見到曬d魚，不過呢餵魚的人都多，所以又多左少少垃圾，但比起香港都已經係好乾淨......個人覺得比較其他地方，杉原海水浴場可去可唔去。

最後一站係小野柳，台北有個地方叫野柳，同呢度好相似，所以呢度就叫小野柳啦。小野柳主要睇海岸邊唔同類型的岩石，受到地質構造變動，加埋海浪長年累月侵蝕沖刷，就形成左好多狀奇特的岩石。石頭凹凹凸凸，有時浪大又衝左海水上黎，所以行在石頭上好滑，有少少危險，要小心啊。

再次強調台東的海岸好靚，海水顏色有層次，又清又乾淨，就算唔去曬以上的地方，都一定要去海邊relax下！