台北中山區有一座兩層高的白色建築物，西式建築風格在台北鬧市中顯得特別突出，呢座建築物名為「台北之家－光點台北」，前身為美國大使館官邸，而家係一個以電影文化為主題，集咖啡店、電影院、雜貨店於一身的藝文青好去處。

台北之家分4個部份，先講一樓，第一部份係光點電影院，佢並唔係一般的電影院，而係類似香港藝術中心電影院，以播藝術、小眾電影為主，又或者係影展得獎電影，總之播放好多一般電影院未必有機會睇到的電影。光點電影院每個月都會揀左幾部電影播放，每日只有6場，全場83個座位，要去到現場買飛。正價台幣$260，早場、學生都有平。想知道電影場次可以去官網睇。

第二個部份係光點珈琲時光，係一間cafe，室內外都有座位。室外環境好寫意，係一個青蔥庭園。空內都唔錯，因為樓底高，仲有落地玻璃窗，好有空間感，都一樣舒適優雅。食物選擇多，沙律、意粉、飯、蛋糕都有，質素唔錯，價錢合理，飲品都好多可以揀，但唔知點解我個日揀左蘋果酒......（不是要做偽文青嗎？為什麼變酒鬼了......）

第三部份係光點生活，一間賣雜貨的商店，有台灣本地同外國的創意設計精品、電影DVD（有港產片呀！）、書、CD等等，都係偏向文藝的東西，有點似香港油麻地Kubrick的感覺，幾好逛的。

呢3個部份都在台北之家的一樓，而二樓就有展覽館同藝文廳，間中會有演講、新書發表、座談會、記者會等等活動。二樓仲有一間光點紅氣球，係另一間cafe，不過比樓下的光點珈琲時光細好多、靜好多、少野食好多，我冇入去。我發現台灣有個特點，台灣人好擅長將一d好小眾的東西包裝到好親民、好易入口。藝術對好多人黎講可能都係比較有距離感，好少接觸又難以親近的，但台北之家會令你覺得其實藝術都可以好生活化，食個下午茶、欣賞下創意設計精品、睇返場藝術電影，多悠閒又有氣質的活動啊～難怪台灣總是充滿文藝氣氛，好多藝文青同小清新可能都係甘樣培養出來的呀。
台北之家 光點台北
地址︰台灣台北市中山區中山北路二段18號
交通︰中山捷運站3號出口行3分鐘
營業時間︰
光點電影院︰11:00-22:00（視當日電影場次而有所更動）
光點珈琲時光及光點紅氣球︰週一至週日10:00-24:00;週五、週六延長至零晨02:00
光點生活︰10:30-22:00;週五、週六延長至22:30
(每兩個月擇一週一休館)
網址︰http://www.spot.org.tw/