少女旅行日記

高雄

[高雄] 高雄必吃推介 南豐魯肉飯+牛老二牛肉麵

我份人好傳統,N年前第一次去台灣要食魯肉飯同牛肉麵,雖然台灣好多好野食,又越黎越多新奇野食,但由始至終每一次去台灣我都仲係堅持要食呢兩樣野,其他的美食都可有可無。2013年去高雄第一次食南豐魯肉飯同牛老二牛肉麵;今年去,再食;下次再去,我都一定會再食。好味又好平!聽下我呢個傳統少女的介紹吧~

南豐魯肉飯
高雄食魯肉飯的地方不多,很多地方只有肉燥飯。魯肉飯有大大舊魯肉;肉燥飯只有肉碎,完全不同啊。南豐魯肉飯好平,只需港幣12蚊。舊魯肉入口即化,好好味!飯亦不只是白飯,有肉燥同滷水汁,再加左酸菜,撈埋食真係好正。另外仲試左5蚊的滷高麗菜同7蚊的貢丸湯,都值得推介。22蚊又好食又好飽。南豐已經有50年歷史,係好多台灣人的飯堂。南豐屬於苓雅夜市的一部份,所以附近仲有好多野食。而苓雅係一個比較地道的夜市,遊客不多,值得一去。(唔好再去六合夜市喇,好多旅行團,又唔係好好食)
地址:高雄市苓雅區自強三路139號
交通:捷運三多商圈站出口行10分鐘左右
營業時間:10:00-24:00

牛老二牛肉麵
同南豐魯肉飯相距約5分鐘路程的牛老二牛肉麵都係推介。紅燒牛肉麵湯底濃,麵條彈牙,牛肉香軟。枱上有辣菜圃,加埋落碗麵做配料好正!(都幾辣架)另外亦非常鍾意小食滷牛肚,唔係好大碟,所以食左兩碟先滿足。牛肚切得好薄,同香港的大大舊口感完全不同。又試左碟炒小白菜,但薑味極重,唔鍾意。一路食一路見到負責外賣的職員整牛肉拌麵,賣相極吸引,下次下次,下次大概可以食。牛肉麵25蚊一碗都幾大碗,牛類小食10幾蚊一碟可能唔算好平,但整體來說都物超所值。中午時間都幾多人,要有心理準備等一等位啊。
地址:高雄市苓雅區興中二路83號
交通:捷運三多商圈站出口行5分鐘左右
營業時間:11:00-21:00

更多高雄相關文章

更多台灣相關文章