這次打工換宿除了清潔外，還有一個職責是照顧民宿的狗BoBo，牠的品種是比熊犬，真係好似熊！其實BoBo也是我揀在這間民宿打工的其中一個原因，因為我細細個就好想養狗，仲諗定如果第時真係養的話，隻狗就叫曲奇，但屋企人唔俾，所以一直都只係想。不過後來又覺得經常去旅行既人其實都唔適合養狗，冇可能成日掉低狗狗自己一個，再加上諗到佢可能會比自己早死，自找的生離死別未免太自虐，所以基本上已經打消養狗的念頭。但這次算是圓了一個心願吧，每日一訓醒就見到BoBo在我床邊、餵佢食野、帶佢出去散步、同佢傾偈（要用國語呀陰功）。佢真係好打耳，個頭圓碌碌，白雪雪，仲會成日望住你同跟住你，仲好似識微笑，總之佢一舉一動都令我個心溶化，每日都情不自禁摸佢100次。我諗到走個陣最唔捨得一定係佢呀嗚。
然後我諗到的是實現夢想從來都不只一條路，而係可以有好多種形式。有時未必完全係你想像中的方式呈現，但其實在另一個角度也是一種實現。大學畢業時曾經想做旅遊記者，因為我鍾意旅行又鍾意寫野，但原來呢一行非常難入，再加上可能沒經驗，總之就是所有相關的求職都沒回音啦。起初也是有失望，但後來我還是用另一個方法做到自己喜歡的東西呀，就是你們在看到的這個page和旅遊blog。而且我覺得寫blog比做旅遊記者更好，因為我可以自由寫想寫的，好玩就強烈推薦，不好玩就直接寫嘩呢個景點都on99既，完全沒限制。我覺得做人還是真誠一點比較快樂，而且將旅行變成工作大概也不會很享受。雖然我沒有真的擁有一隻狗，但都用另一個方法養了一隻超級可愛的狗。所以呢，不要因為做不到心中所想而難過，再去找第二條路，即使迂迴一點都不要緊，可能更適合你。又或者，你根本已經走在夢想的道路上而你自己不察覺。
寫這篇的時候BoBo一直在我身邊走來走去，牠就是我的曲奇啦！佢真係好打耳架。喂你唔好咬我張被......