通常去一個國家旅行我都傾向只食地道美食，去日本唔會食西餐；去韓國唔會食中菜；去台灣恨不得餐餐都係食魯肉飯同牛肉麵。但去到台北，真係忍唔住要去傳說中的台灣築地市場－上引水產食壽司、刺身、海鮮，因為真係好食！平價魯肉飯食少餐吧～～

上引水產位置有點隔涉，在兩個捷運站中間，無論邊個站落都最少行20分鐘，而且好需要google map輔助。由捷運中山國中站搭的士去就台幣300蚊左右，如果肚餓我建議搭的士。哈哈。一去到門口已經見到有人企係度食緊野，因為門口放置左幾張高枱，大家可以即買即食，不過冇冷氣架。

入到去就會見到人頭湧湧。上引水產分左幾部份，中間係外賣區，格局極像一田超市的壽司部，所有食物一盒盒pack好曬俾大家揀。有壽司、刺身、生蠔、長腳蟹、甜品、生果、酒等等。買完可以出去頭先個幾張高枱食，唔係就可能要拎返去酒店食。由於呢部份太像一田，不太有吸引力，而且我目標也不是來買外賣，所以我冇試過，唔知好唔好食。（但友人說其實質素挺高，價格也不貴，不是一田那種情況啦）

我的真正目標係後半部的立吞區，即係冇得坐而要企係度食野既地方。立吞區又有分食壽司定海鮮，是兩間不同的店。我會建議先拎左壽司區的飛，因為通常要等1-2個鐘，拎左飛就去食海鮮先，海鮮區通常唔駛等，所以食完海鮮就應該差唔多可以食壽司啦！
海鮮區我強烈建議食鎮店之寶－海鮮拼盤！一份台幣$1280，即係港幣$320左右，足夠兩個人食，材料超級豐富，有三種蟹、生蠔、鮑魚、帆立貝、吞拿魚刺身，樣樣都新鮮好味，最深印象係毛蟹，蟹肉非常鮮甜！！以呢個質素來說價錢合理～呢度仲可以散叫唔同海鮮同魚生飯，我見到隔離食魚生飯的賣相也很不錯啊！

過返黎超多人排隊的壽司區，大家真係要盡量揀平日兼4-6點呢d唔係食正餐時間黎，唔係等兩個鐘走唔甩，附近又冇其他野行，真係得個企字。呢度有壽司、軍艦、手卷、刺身、沙律、湯、少少其他野食（例如牛扒、鯖魚、燒物），款式OK多，但有時會落單先知原來某d種類已經冇曬。例如有次落單佢同我講冇曬貝類食物！！（尖叫）即係我最愛的帆立貝同北寄貝都冇，極度失望！！但再上一次黎就食到。總括黎講壽司同刺身都新鮮，味道唔錯，雖然不至於好驚喜，但都係會想再返黎食的質素！價錢就一個人大約港幣$200左右吧。

另外左手邊有活海鮮區，可以即時揀海鮮。而隔離有代客烹煮區，所有在上引買的材料都可以拎黎呢度煮，價錢不詳。而樓上二樓仲有得打邊爐，不過我都冇試過，價錢應該係偏貴的。右手邊仲有個露天區，食燒物的。(有得坐！）

俾個預算大家，我黎過上引兩次，一次係lunch，只食壽司區，一個人大約食左港幣$150；另一次係dinner，食曬海鮮區＋壽司區，一個人大約食左港幣$350。講唔上好抵，但我覺得值既。丫，順帶一提，呢度服務質素一般架咋。可能對台灣人有特別期望，覺得佢地會比較熱情有禮，而呢度就完全冇呢種感覺，所以大家都不要有期望啊。

上引水產
地址:台北市民族東路410巷2弄18號
交通:捷運行天宮站或捷運中山國中站出，行20分鐘或轉的士
營業時間:每日06:00 - 24:00
特別留意:上引水產要用現金付款，不提供信用卡服務。