台中清境有小瑞士之稱，一大片翠綠的山景，加上一隻隻綿羊仔隨意在山頭漫步，根本就是飄零燕的場景～～少女非常非常喜歡清境，好寫意好舒服。趁大地回春，怕凍的大家終於唔駛再匿埋屋企，可以搵個週末去個春天小旅行，親親大自然，吸收天地靈氣。（其實係咪只有我怕凍......）如果唔打算留宿清境的話，可以考慮黃昏去附近的廬山溫泉住一晚溫泉旅館，整天的行程都好養生。哈哈。

清境位於南投縣，台中去最近。由台中火車站出發，搭南投客運至埔里，再轉另一架客運去清境，車程約2小時。在埔里轉車好方便，一落車就已經係轉車的巴士站，直接又可以上去清境的車。記住留意客運的班次時間，因為一日只有幾班車，錯過左一班就有排等。

如果以景點來說，清境主要景點只有兩個，就係小瑞士花園同青青草原。但整個地區沿路風光都非常優美，所以在我眼中又唔只係兩個景點甘簡單。先講位於山下的小瑞士花園，就是一個歐陸式的花園，入場費台幣$120，老實說我覺得公園不應該收費啦，不過一場黎到就入去行下吧。花園有一大片草地，種植了好多唔同品種的花，七彩繽紛。花園中間有個湖，會見到鴨子在水中飄浮或者在岸邊hea。花園還有其他不同的擺設，風車就是其中一樣經常出現的東西，令到花園的感覺好童話。那天還在花園認識了來自台南的三兄妹，他們帶了小狗Jimmy來玩，我地就一齊玩左陣。很可愛的Jimmy狗～～

小瑞士花園旁邊是一間叫紙箱王的小店，展示的全都是紙品藝術，可以看到很多紙摺的世界名勝建築、小擺設，其中大部份當然都係可以買走的。靚就幾靚，但唔會買，哈哈。

之後就開始上山啦，因為青青草原就在山上，即係一班綿羊仔就在山上等緊我啦～上山的步道風景好靚，行得越高感覺就越心曠神怡，雖然中間曾經一度俾幾百級樓梯嚇親，但行下睇下景其實都唔太辛苦，慢慢行大概行一個鐘多ｄ就到青青草原啦。

青青草原入場費平日台幣160;假日200。去到青青草原就會見到好多綿羊！！佢地就散落於山頭，食草的食草、散步的散步、發呆的發呆。大家可以隨意摸佢地同買飼料餵佢地。我話俾大家知，呢度的羊係非常現實的羊，你冇野俾佢食佢係會立即走，完全唔理你，想同佢地影合照好難！！所以大家想同佢地玩下，最好買飼料喇，不過佢地會流曬口水去你隻手度......

每個星期六、日青青草原都會有綿羊show，一日兩場，時間係朝早9點半同下晝2點半。主要會表演剃羊毛，同埋會請現場觀眾上台同綿羊仔互動一下。主持人都幾搞笑。綿羊show好多人好熱鬧，想睇得清楚少少要要早ｄ去霸個靚位。

同綿羊玩完，show又睇完，之後都沒有特別地方架喇，都是在山頭隨處逛，但會有好多意外驚喜，例如忽然發現風車！！

又會忽然發現櫻花。

再忽然發現食物。好農家感覺的竹筒飯，還有好新鮮的菜！！

輕輕鬆鬆大半天就過去了。建議大家晴天的日子先去清境，你可以想像如果落雨的話整個山頭根本無地方可避，陰天的話影相效果都差好遠。清境有好多靚民宿，有成座城堡的、像英式莊園的......曾經都想住一晚，不過諗諗下黃昏之後整晚在山頭其實沒有什麼活動，所以還是選擇了離開清境，去了附近的廬山溫泉旅館住宿。如果在清境住一晚，很多人會在第二天早上到另一個山頭合歡山看日出，但少女對早起身一事非常抗拒，所以還是舒舒服服泡溫泉好了。

由清境去廬山都是搭南投客運，去到霧社落一落車，過對面搭去廬山的客運，全程約一個鐘，都係要留意班次，因為班次好少。而廬山是一個非常細小的地區，有一條吊橋，一條買手信、有餐廳的街，其他地方都是溫泉旅館，可以說真的沒什麼，來這邊完全只是為了溫泉。廬山泉水屬於無色無味的鹼性碳酸泉，具有美容的療效，加上是純天然，所以是台灣有名的溫泉區。

這次入住的是玉池溫泉會館，就在廬山吊橋旁邊。因為3個人的關係，所以住4人房－VIP樓中樓。平日每晚台幣$3800，港幣$950，如果4個人的話每人只是$250左右，算平。旅館的外型是一排排別墅，度假風濃厚。

房有兩層，設計以木為主，感覺舒服。下層是客廳加獨立溫泉房，上層是睡房。客廳有梳化同電視，有點簡陋，有一點點像長洲度假屋的感覺。溫泉池好大，3個人一齊浸都仲有好多空間，好正。

睡房有兩張大雙人床，都有電視。床好軟好舒服，而且在木色的環境下特別放鬆，訓得好好。

旅館有室外公眾溫泉池，但好細，不太吸引呢。整體來說都舒適，但又沒有很特別，也未到想推介的程度，就是一個可考慮的選擇。

最好玩的是，在旅館一些空曠地方可以玩煙花啊！！！閃閃閃，好靚啊～～順手祝大家有個閃亮的羊年！咩～～～～

小瑞士花園開放時間：09:00 - 21:00 入場費：台幣$120
青青草原開放時間：08:00 - 17:00 入場費：台幣$160
玉池溫泉會館地址：南投縣仁愛鄉廬山溫泉精英村榮華巷25-1號
房價：平日每晚台幣$3800（VIP樓中樓）
網址：http://www.yuhchyr.com/
南投客運路線及班次時間表網址：http://www.ntbus.com.tw/