台中

台灣台中 | 古蹟華麗變身手信勝地台中宮原眼科

2015年10月07日

初初聽到宮原眼科呢個名時，完全冇頭緒係咩東西，後來先知道呢個名的由來係一座日佔時期興建的眼科醫院。而呢間醫院近年由台灣日出集團接手重整，將古蹟變成賣手信的地方，吸引左好多遊客去潮聖。

宮原眼科外表非常有歷史質感，保留30年代的紅磚，但頂層係玻璃天幕，顯示一種新舊交融的設計。入到去會更有驚喜，因為佢係一個充滿古典味的華麗圖書館，又或者係中藥店！店內樓底好高，而且裝修好有心思，好多古典裝飾，木書櫃、木抽屜、吊燈、鐵罐、天秤等等都營造左一種好懷舊的氣氛，係個影相好地方。

店內有兩層，上層係餐廳，下層主要就係賣日出呢個品牌的手信，有朱古力、鳳梨酥、太陽餅、乳酪蛋糕、曲奇、蛋卷、荼葉等。而最大賣點係款款包裝都好精緻同特別，有d包裝到好似一本書、有d就好似文具，好有驚喜。就算冇特別包裝，只係一個盒，個盒都係非常精緻，同其他品牌的手信包裝好唔同，用黎送禮一流！相信少女們會好鍾意！不過價錢會偏貴一點，大部份價位都係台幣$300以上，但聽講質素都唔錯，所以都可以買。

除左手信外，宮原眼科仲有一間賣飲料的店同埋大排長龍的雪糕店。雪糕店的雪糕口味非常多，花多眼亂，淨係朱古力味都有10幾種，好誇張。而且仲有唔少特別的口味，例如天天天藍、明天會更好、思念總在分手後......建議愛冒險的人去挑戰下。價錢就有點貴，單球台幣90；雙球150元；三球以上每球75元，即係一球港幣$20左右。