搜索

少女旅行日記

霎眼27歲 是他也是你和我

2016,27歲,名符其實的80後90前。離開無憂無慮的校園好幾年,在職場上不再是覺得自己是零的fresh grad,轉過工,升過職,加過少少人工,終於來到職位高不成低不就的senior executive,大事繼續冇你份管,瑣碎小事有增無減。偶然懷疑自己的工作能力,不過比較多時間相信自己懷才不遇,老闆冇眼光。開會100次提出10次意見大概2-3次會被接納,滿足感談不上,挫敗感都不算多。上位沒那麼快,等放工仲慢,等放假更加等到天荒地老情深深雨濛濛。工作目標是每日無驚無險準時放工,趕得切愛回家仲食到溫暖的住家飯。一個月冇幾多日做到,但有目標總好過冇。你同我講後生女而家唔捱幾時捱,我同你講OT有損身心健康仲要冇補水點都係你有著數我冇求下你放我走啦。有緣結交過出生入死兩翼插刀的好拍檔是工作上最大成就,有就一齊開心跳起yeah得閒bbq,冇都唔強求,大家都係打份工啫,我明。

幾年間遇過mean爆老闆、同一舊舊老屎忽交過手、俾日日M到的阿姐玩弄過、見識過隔離 department同事笑裡藏刀的功力、湊過奶都未戒字都寫錯的小妹妹……雖說賤人有好多種,有排你捱呀女,未到身經百戰的境界,但應對不同賤人的方法也總算學得到,間中扮蠢、間中表面唯唯諾諾內裡完全放空一句都聽唔入耳、間中發下小脾氣單聲俾大家知阿姐我唔怕你班狗架、間中話你on9怕你嬲阿姐廢事同你計我睇高登笑下好過……各式招數開始運用得宜,唔再傻豬豬為著公司裡的珍禽異獸而驚恐或動氣。

作為平凡打工仔,錢當然沒賺很多。樓真的不要再說了,港人港地都可以唔關你事吹咩你係香港人又點。但只要決心對買樓問題視而不見,爸媽仍然願意每日見到你在屋企行行企企,其實每個月人工都足夠快樂去生活,不至於要拼命去生存。可以間中high tea(for ig use only)、睇返幾場戲、買個唔太名的名牌袋、追下潮流換下電話相機。最重要,一年去到3幾次旅行,令人生隔一排可以有所期待,Facebook又有d野可以俾人like下。返工返到麻木,放工盡情吃喝玩樂,太陽底下無新事,內心空虛就一定架喇,日子還是一天一天過。夢想唔係冇,但冇咩事都唔會拎佢出黎講,因為聽日仲要返工呀早d訓啦。

來到人來人往的愛情路上,離離合合好幾次,人越大自我越強,越唔願意為任何人改變,我就係咁架啦,活左27年都係咁架啦,想我改?就憑你?然後不斷地輪迴,A君太大男人;B君唔夠細心;C小姐太港女:D小姐太串咀。再問一千次:點解冇真愛?點解?為愛情奮鬥,從來沒保證,各人自有各人的修為和緣份,sorry nobody can help。暗戀、單戀、相戀、失戀,咩都好啦,愛情可能性太多,每段關係總有問題,有經歷過就當賺左,拍拖盡情笑,甩拖盡情喊,喜歡戀愛的你終於會發現眼淚一次比一次少,你就知道最愛你的人始終是自己,每個人本來就是獨立個體,冇人老奉要愛你,其他人再愛,都不過是你生命的陪襯。

27歲,迷茫在於過去接近20年都走在一條社會已經幫你規劃好的路線。早幾年初踏社會,樣樣新鮮,一鼓作氣衝出去,抱住一句「我試下咋麻」,沒有難度。到真正在自己選擇的道路上走了幾年,才發現時而進退失據,時而在現實與理想中掙扎,但每個人都早已分道揚鑣,只剩下自己面對。不能滿足,不敢停站,然後怎樣?這一年聽「給十年後的我」,情緒異常激動。軟弱嗎?當初堅持還在嗎?你忘掉理想只能忙於生活嗎?

我們苦苦思索人生的意義,有人一出生就有天賜的力量,目標堅定明確;有人花盡一生時光都未有半點頭緒,親,不要緊。當你一直以為自己原地踏步,但其實離開校園後,進步早已不能再量化,你沒有再從第100名進步到第50名,從50分跳到80分,你以為自己只是在重覆生活,茫然地虛耗生命,其實你的內心在不知不覺間變得強大。回頭再看,這幾年日子再難過再失望再迷茫再多考驗,你不是靠自己走到今天嗎?你不是已經開始懂得如何獨自應對成長的難關嗎?你不是已經學會不再對難過的事太上心嗎?經歷與智慧無價。27歲,往後的路還很長,人生會無止境地迷茫,難關更是無盡頭,但宏願縱未了,奮鬥總不太晚,我們還是會努力一步一步向前走,一邊呻一邊成長。聽日一定會更加開心架,你話係咪呀哈姆太郎?
後記:呢篇文的靈感來自早兩個星期,我同一班全部80後的同事去唱K,總共9個人。典型一班人唱K情景就係同一時間有人唱歌有人玩電話有人食K Buffet有人吹水有人發呆,各有各忙碌。直到陀飛輪出現,所有人,係所有,即係9個人都異常專注望實個mon,點歌係一個人,拎咪唱都只係一個人,但其他人冇咪都好投入跟住唱,全部人,再次強調係全部。呢個畫面好深刻,呢首歌唱緊呢班仔仔女女的心事。所以我都要寫一篇,關於呢班仔仔女女的心事,不只是27歲,是他們也是你和我。