好多人結婚，都以為自己係主角，花盡心思，大灑金錢去選一個華麗場地、精心佈置、一晚換幾套晚裝、戴好多金銀手飾、請最好的化妝師和攝影師、安排豐富節目，但他們不知道的是，其實以上所有根本nobody cares，除了新人自己兩個，更多時只有新娘自己一個。現代婚宴的最大特色是排場要多隆重有多隆重，新人和賓客之間卻毫無交流。邊得閒同你交流呀？阿姐今晚難得出show，晚裝換完一套又一套，個妝轉完一次又一次，要趕rundown，大合照出場致謝辭播成長片段播結婚相slide show播朝拍晚播敬酒再大合照有請新娘既親戚新娘既小學同學新娘既中學同學新娘既大學同學新娘既同事好再到新郎個邊我地一齊loop多次送客全劇終。乖啦你地食乳豬食翅得閒見到我路過咪讚我兩句「今晚好靚」、「套衫好靚」、「個場好靚」得架啦，冇咩事唔好滾搞我，我入返去換衫先喇，有咩下次出黎食飯再講。

下？其實你請我黎做乜春？我要睇show紅館大把有得睇，人地一晚換得仲多衫仲又唱又跳最貴都可能只係六百八。作為被邀請出席婚宴的客人，對所有公式化的東西都無興趣，只不過希望分享新人的喜悅，親自送上祝福。鬼記得你個場樓底有幾高、著咩色晚裝、段朝拍晚播有咩睇、成晚戴左幾多隻手鐲咩？大家只會記得「我成晚都冇同佢講到一句野囉」、「我淨係影大合照個時同佢講左句恭喜」、「坐左成晚齋食飯好彩隻乳豬都幾好食」。

最壞的情況係新人和賓客根本不熟，一邊為了場面盛大而請；另一邊為了俾面而出席。好多人都覺得出席婚宴好悶，通常都係當食餐飯，或者當黎同其他同學聚舊，因為新人是遙不可及的存在，好像只存在於投影機裡。新人是主角？我就快連新人個名都唔記得。臨近年尾，收帖收不停，大家都絕不介意俾開心錢，介意的係經常花時間去睇一場場過目即忘的show。沒有幾多對新人還記得婚宴的真正目的和意義。每個婚宴的模式其實大同小異，最大分別就在於賓客有多投入，現場氣氛有多動人。再瑰麗的場地比不上新人對望時不經意流露的甜蜜笑容，再昂貴的金器手飾比不上新人訴說彼此的愛情故事時的羞澀表情，再精彩的表演節目也比不上新人和客人真誠對話與祝福時所表現的感激之情。無論你在多豪華的五星級酒店設宴、換幾多套晚裝、段朝拍晚播剪輯得多好，對賓客的投入都毫無幫助。大家想看的都不是那種用金錢堆砌出來的婚宴和新人空洞疲憊的笑容。沒有人會介意你一整晚都只穿同一套衫，因為幸福的你一定是全場最靚的。沒有人會介意你沒有成長片段和朝拍晚播，因為跟你一起成長的人只想聽你親口說你有多快樂。唯有那種充滿真誠祝福、由衷的替新人開心、被新人的真摰愛情所感動的氣氛，才是整個婚禮的精髓，這些用錢買不到的才是令新人和賓客永誌難忘的magic power。

圖片來源：ramblerhotels.com