搜索

少女旅行日記

點解既?點解既?點解既?

其實唔只吳若希,我地都成日問「點解既」。

辭職?點解既?
分手?點解既?
搬屋?點解既?
養狗?點解既?

我俾人問得最多絕對係:「你又去旅行?點解既?」雖然我表面上會微笑答有假丫麻,但心裡其實係:你傻的嗎?去旅行都有得解架咩?係咪要答你我想增廣見聞定係用偽文青的語氣同你講「世界太大我想出去看看」?想去咪去囉問問問。

我地好習慣問人點解,同埋答人點解,彷彿生活上每一個決定都要有原因,而最好係有說服力的原因。
人工低/老細唔好/冇職升/學唔到野所以辭職 - 哦,都OK既。
純粹唔想返工囉 - 下?點解唔想返呀?發生咩事呀?老細唔好呀?唔返咁做咩呀?幾時搵新工呀?想搵咩工呀?妖,問夠未?知唔知咩叫想同唔想?由心而發的感受,好多時都冇得解的。

成日去諗個原因說服人地,說服自己,不如單純問下自己個心想點,跟隨自己的心意仲好。你諗到一個原因去說服人,人地就自然諗到一個原因去反駁你。咁你係咪就唔做你想做既事?

阿信話:每個渺小的理由,都困住自由。

生活是屬於自己的,將來老左你希望可以無悔咁講「其實自己已經做左好多想做既野,人生不枉過」定係「媽,為何結果不是我想的那樣,我仲有好多野未做架嗚嗚嗚」?如果下次再有煩膠問你「點解既」,可以直接答「收皮啦吳若希」。

又要威又要戴頭盔之利伸:其實我唔討厭吳若希架,仲覺得「來年多麼驚險不要太早框了線」好好聽,fans唔准鬧我呀。

踏入五月天,祝我們更有勇氣去選擇自己想要的生活。