我真係好憎我個私人健身教練。好憎好憎。每次上堂training，無論我講幾多次好攰好辛苦冇力手好痛腳好痛背好痛做唔到我唔得喇我要死喇，佢都一概當聽唔到，目無表情叫我繼續做唔好停加油頂住仲有幾下仲有幾分鐘做埋佢，無視我怨恨的眼神與哀鳴，繼續迫死我。

每年我都有個小目標俾自己，前年就係考車牌，考到啦；舊年就係斷捨離，一年只可以買10件衫，都做到啦；今年係減肥。但減肥背後唔係一件事，係好多件事，如果你有減過你應該會知道。好多人都鍾意問因由，到底係咩驅使我有呢個目標呢，好簡單，當我人生尚未攀上高峰，我體重就率先達到高峰，因為肥囉。無論客觀數字定主觀視覺，身型都唔係一個理想狀態。我唔係覺得一定要瘦，我係覺得要健康要靚，少少肉其實幾靚，勁瘦個d唔靚，但我係超過左少少肉個d，係多左d肉，所以我想減少少，都冇病態地覺得要減到好瘦，總之一定係正常健康標準啦。

於是年中我展開左健身室日與夜之旅，好多時間都係健身室出現，一邊做gym一邊怨恨教練。我成日同教練講我真心討厭運動，完完全全為左要瘦先做，如果我夠瘦，我一定唔會再做。呢個世界所有你唔係真心鍾意只係覺得有需要而做既野，都註定係痛苦，相信大家都明，最好例子就係返工。當然我教練係完全唔會理我鍾唔鍾意，佢應該心諗：做你就做啦講咁多野留返d氣做多幾set好過啦。

操到好辛苦的時候我都會睇下gym room其他人，佢地都係我繼續操的動力，因為大家都好辛苦呀，個個唔係操到面容扭曲就面如死灰，但大家都好努力。所以唔好信d女post個d勁優雅化曬妝做gym ig story，真心做gym又點會可以咁靚丫，d汗都搞到個妝一早溶曬啦。

有人好鍾意大隻仔，覺得好型；有人唔鍾意，覺得好多肌肉好怪。我本身都冇咩特別喜好，但自從我自己開始做gym，我就覺得大隻仔真係好正，唔係外表型唔型咁簡單，而係我知道每個大隻仔背後都一定付出過好多努力同需要無比堅持，先有呢個身型，淨係呢份精神已經好值得心心眼。有次落堂我超級攰，同教練講我覺得我今日好似死左十次，落左地獄十次咁辛苦。教練繼續目無表情，講左句：但係你會無限復活架麻。佢又講得冇錯，堅持就係一件咁樣既事，無論死幾多次都會無限復活，而每一次復活都帶住一個更好既我重返人間。教練話我成日一邊做gym一邊話做唔到做唔到，其實都係假，根本係做到既。

開始做運動已經半年，一堂又一堂之後，我對教練既憎恨係有增無減。但最近好多人話我瘦左，上磅都見到數字有成續，雖然未達到最終目標，但都算係有成果。我本身好難瘦，因為我成日飛，再加上本身虧成日病，gym做下又停下，香港會節食但去旅行又食返曬，你地都見到我旅行食幾多好野架啦，減少少之後都好易肥返，所以可以維持到一段日子成個人睇落真係瘦左，線條firm左好多，都已經好難得好開心。同埋令我呢個從來唔做運動既人培養左做運動既習慣，都係一個好大得著。教練其實係我恩人，除左教我做gym，仲教左我好多關於飲食習慣方面既野，我超級感激佢，不過上堂個陣我都係好憎佢，勁憎。哈哈哈。

又愛又恨似乎都係人生常態。

PS. 相係兩年前在布吉見到沙包亂玩一通個陣影，想幫呢篇文搵一張貼題相先記得曾經有呢個時刻，意想不到既係兩年後我真係會走去學泰拳，仲好認真打左一段時間。活著真好，永遠都有新鮮事可以做，可以學。