少女旅行日記

做一隻出色的單身狗

今日有朋友話我係一隻幸福的單身狗。我諗左陣,其實都係。我絕對唔係要宣揚單身主義,因為我本人係一個為愛而生,非常喜歡戀愛的少女。我人生的三大嗜好係旅行、寫字同埋戀愛,只不過我呢一刻係單身狗。所以我並唔係想話其實毒L一個更開心、單身萬歲、一齊單身啦喂......呢d倒自己米既野。

現實情況係我深深明白拍拖有拍拖的開心,單身有單身的開心,而同樣兩種感情狀態都會有各自的煩惱,有又煩冇又煩,沒有誰比誰更高尚和更幸福。所以重點並不在於你有拍拖定單身,而係你點樣令處於不同狀態同關係的你都能夠過得開心快樂。

我單身,就會盡情享受單身的自由,鍾意去邊就去邊,想見邊個就見,唔駛同人交代,唔駛顧及人感受,唔駛受人脾氣明明覺得對方好無理都要硬食,唔駛俾人影響心情。當所有時間都係自己,我就會想盡辦法令自己過得好。我承認單身係有d慘豬既,見到人地sweet sweet有男朋友錫有女朋友氹個陣會覺得:媽的,點解我冇?我都想要。我覺得冬天好凍。阿姐話曬都係一個陽光少女呀。(你自己以為係啦)但我轉頭就會掛住睇平機票而忘記左呢種不爽,又或者我會陷入鬼怪的世界覺得自己想要的愛情已經超越人類的界限d凡夫俗子係唔會明,又再諗下阿邊個拍拖拍到勁唔開心個男朋友勁弱智......之類啦。即係,用任何方法令自己做一隻開開心心的單身狗。

我拍拖呢,就會盡情享受兩個人一齊的時間,一齊去經歷唔同的事,毫無保留地同對方交換幸福。冇人拍拖係想分手,大家都係盡力而為,希望對方同自己都開心。兩個人的關係會有好多不受控的情況,但我會好好收藏每一秒相處的時間,結果無論係點我都覺得有一齊過就係賺左既,一定係開心比唔開心多。

關鍵係心態。無論拍拖定單身,我都可以好幸福,只係通向幸福的道路不一樣,但結果係一樣。無論處於任何狀態,都一定有好處有壞處架啦,我真係冇見過任何能夠稱之為完美的東西出現過。我覺得人生的大方向只有一個,就係為左開心,你考慮返唔返工返咩工、拍唔拍拖同邊個拍、識唔識朋友同邊個聯絡多d少d接觸邊個......都係通向人生開心的一些手段同方法。每個人想要的開心都不一樣,所以作出不同選擇,但目標總係一致,就係要幸福。

願天下所有單身狗都健康快樂成長,我會與你們同在。

更多生活碎碎念相關文章