其實每個人都係充滿缺憾。

話說我近來同sales好有緣，去到邊都俾人sell，而所有sales都係同一個技倆，就係先彈到你一文不值，再一副想拯救你於水深火熱中的口吻，再sell你買野。

例如去做facial，就會俾人話毛孔大呀、皮膚乾呀、有暗粒呢d都基本啦都聽到冇感覺。但近來瘦面療程興起，就開始連本身無辜的面型都慘被攻擊，jaw line唔夠v呀、兩邊面唔對稱呀、蘋果肌唔夠大呀之類都出曬黎。

跟住去按摩想輕鬆下啫，又俾人話嘩你膊頭咁緊既平時擔泥架你返咩工架哦對電腦既唔怪得之啦真係好緊呀嘩你睇下d筋實曬既。（我一定係會睇到我背脊既筋啦）再落少少就到你條腰又好崩緊啦你腳d淋巴又塞曬啦咁樣唔得架係時候買返個package等阿姐幫你通淋巴喇。

唔駛通喇我去做運動得架喇，又有人衝出黎話你個body唔得喎，肌肉唔夠喎手又唔夠力腳又唔夠背又唔夠，下半身脂肪積聚兩邊身又唔平衡，仲有呀d筋好硬咁樣會影響你做運動我仲未講完呀你心肺功能奇差唔夠氣我強烈建議你上私人教練課程練肌肉加一對一打拳練心肺再加專人幫你拉筋再再再加上各式各樣運動課程最好你咩都join曬啦我都係為你好啫。

唉好啦講到我咁廢就去搵中醫調理下啦，中醫輕鬆講出一堆內藏問題每個中文字我都聽得明但放埋一齊就聽唔明，不過唔重要啦，總之我好廢我好虛我要keep住覆診丫麻我預左架喇。結論係連中醫都sell我多次強調我要長期覆診。

每次俾人sell完我都開始懷疑人生，如果我個人玻璃心少少，我應該會選擇了結生命算數，反正我個人咁多缺憾，睇怕都唔係話俾幾千幾萬蚊join幾個package就可以救得到。直頭覺得我應該先死去一次再重新出世同長大，先有可能解決到部分問題。但又可能我d缺憾都係會繼續跟住我重生，因為呢個世界根本都冇人係完美無缺，活著就是罪。有人過肥有人過瘦，有人皮膚好但身體差，有人身體好但筋好硬，有人樣好靚但肌肉唔夠，有人全身都好柔軟但皮膚差......永遠都有缺失，有邊個冇丫？本身sell我個班人都一定有啦，我會建議facial 個班人去上健身教練堂keep下身型：按摩阿姐同健身教練去做facial keep返個樣；而佢地成班人都應該去睇睇中醫一齊調理下。

人都係會想追求更好，想有進步，盡可能貼近完美，但能夠接受自己不完美都好重要。要清楚自己優點，同時了解自己缺點，先可以建立到自信，下一步就會知道自己真正需要同想追求既係咩，唔會輕易受別人意見所動搖。專業意見我會聽，自己消化完，再按需要去尋求適合的改善方法。呢班sales指出我一堆問題，其實好多我本身都知道，邊d要早解決邊d根本唔太需要解決我都好清楚，我真係好有興趣或者自己都知道好需要改善我都願意試，但有d廢話真係唔駛理，更加唔好放心上。心靈健康同身體健康係一樣重要架。

講到缺憾，其實又點只班sales講既咁少丫，我仲有大把佢地睇唔到既內在缺憾呀，真係太睇小我喇。呢個世界所有人唔係身體有缺憾就係心靈有缺憾或者性格有缺憾架啦，冇事既。只要我地明白呢個道理，內心夠強大，任何人都攻擊唔到我地。