近排睇緊一套好好睇既韓劇叫《陽光先生》，起初睇係因為呢套劇個編劇係鬼怪個編劇，覺得應該都會好睇。而男女主角係真實年紀差成二十幾年既李秉憲同金泰梨，雖然年齡相距好多，但睇套劇又覺得佢地幾襯，另外仲有兩個男配角都各有各魅力，簡單黎講三個主要男角色都唔錯......好難揀。（誰要你揀？）

套劇最吸引既地方係個故事背景係1900年代的朝鮮，當時朝鮮四面受敵，幾個國家都想侵佔佢，其中日本同美國都有軍隊進駐，而日本就不停諗辦法想佔領朝鮮，朝鮮主權受到好大威脅。所以套劇最主要唔係講愛情，而係講唔同角色活在呢個動盪時代有咩唔同取態。有人係貴族小姐本應養尊處優但願意為救國家而學射擊做義兵；有人出身卑微細個係奴僕，受過不公平對待所以勁痛恨朝鮮一心想報仇但又暗藏愛國心；有人係有錢大家族出身吊兒郎當無所事事但為國家辦報社以文字救國；有人係經歷過戰爭同被國家遺棄想做逆賊；有人就本身已經係埋沒良心既賣國賊一早投靠左日本，仲幫手對付朝鮮人等等，好多唔同角色。而最好睇就係佢地每個人內心既掙扎，要救國定賣國；要出一分力定視而不見；要錢定要公義；要報仇定原諒。

睇睇下覺得好似香港而家個情況。個種你睇住個社會崩壞，好心痛，好想去做d野改變，但又覺得好似冇咩可以做，又或者做左又可能會令自己身陷險境，又唔知有冇用，進退兩難既無力感。坦白講我覺得香港而家個環境都幾絕望，早幾年岩岩開始意識到有唔妥個陣都仲有好多憤憤不平、會成日鬧、會成日睇好多人評論同意見、會寫幾句、會同人傾、會想改變。但近年都係無能為力感覺比較多，荒謬的事係多到你都唔知跟進邊單好，每單都達到令人髮指的程度，但如果日日都有荒謬既事，慢慢都係會由驚訝變到開始麻木，你都唔想再討論。而且有一點好重要係，以前我會覺得所有問題都係源自政府既人同政策，但近年最令我失望係香港人對每件不公既事種種無情既冷嘲熱諷。議員被DQ、抗爭人士入獄個d抵死呀、搞事就入去坐一世啦、快d死啦之類既言論睇到我心寒，下？你地sure 自己係人黎既？可唔可以去check一check？我真係唔太sure喎，至少我對人類既認知唔係咁樣。而最可怕係發現原來有好多人都真心咁諗，佢地真心覺得現狀唔需要改變，想改變就係搞事，仿佛有公義有常理既人先係異類係小眾。如果問題係來自香港人本身，而唔單單係政府一小撮人，咁仲點樣有得救呢？

呢個時勢我地究竟可以做咩呢？對崩壞既政局同一堆未訓醒既人，我真係諗唔到。但自身可以做既就有兩樣，一就係做好你自己本份，多留意時事，多關心社會同弱勢，唔好成日活係自己個世界，不聞不問，幫到幾多得幾多。你永遠唔會知，你行出微小一步可能都可以改變人。好似我當初寫旅遊blog其實都冇諗咁多，只係想分享一下呢個世界好大有好多得意野，但會有讀者同我講真係因爲我而去旅行，去好遠既地方，親身體驗到生活可以咁有趣可以行到咁遠。而當你影響到一個人，可能佢又會帶住你既野同佢自己既野去影響其他人。

第二就係增加自己競爭力，為自己舖一條後路。學好另一種語言、發展一門技能、做好一項專業等等都可以，總之就係要令自己無論去邊都生存到，咁你就唔再局限於一定要留係香港。你可以繼續愛呢個地方，但有一日真係覺得太唔適合生活時，走都要走得有自信，呢樣真係好重要。個個都話想移民，你移到去第二度係咪會搵到理想工作，有理想人生，就全靠你而家建立既野。如果個人本身冇競爭力，去邊都係生活得差，亦只能默默接受環境改變。

套劇下星期先大結局，不過真實的歷史就係後來朝鮮真係失守，主權淪陷成為日本殖民地，被統治35年，直到第二次世界大戰日本投降，先被分裂為南北韓。香港應該唔會再成為殖民地，但一早已經失守，成為比做殖民地更可怕既角色喇。

（網絡圖片）