（內容含劇透，但我相信除左我自己，其實大部份人都一早睇完成套劇）大時代首播時，年紀尚小，是還在看卡通片的年紀，所以未有觀看。重播時，也只是在卡通片與電視劇中遊走的時代，也沒特別留意，印象中還是未接觸過。今次深夜再重播，才是我第一次真真正正認識這劇。而我覺得而家似乎係睇大時代的最好時代。

因為，劇中的人物太令人熟悉了。首先是靈魂人物丁蟹，我一直覺得佢幾得意。佢為人兇狠，脾氣暴躁，但有時又好講道理。佢搵龍成邦尋仇的時候，先從佢個女龍紀文入手，但佢完全冇打算傷害紀文，仲讚佢夠孝順。佢搵周濟生尋仇的時候，又從佢老婆華姐入手，但同樣，都唔係想傷害佢，同佢傾多兩句又覺得華姐真係一個唔錯既女人，覺得周濟生有呢個老婆係福氣。佢唔單止識欣賞人，仲會係龍城邦同周濟生誠心道歉既時候選擇原諒佢地，唔再虐待佢地，又幾大量同有分吋。而且佢仲一心返香港搵方家報恩，雖然佢有少少人格分裂，但我覺得呢個人其實唔係太衰仔。但越睇落去，就越對呢個人唔耐煩。我發現佢理解能力極差，好似成日都聽唔明人地講乜。第22集，玲姐係醫院同丁蟹講點解會咁驚佢，佢唔直接答丁蟹而用例子答佢，一字一句清清楚楚話佢知佢做過乜野事令玲姐覺得佢係幾咁令人討厭。但佢似乎唔明，佢仍然覺得自己冇問題，仲反問點解玲姐變左質。下？請問係邊一句聽唔清楚？人地已經話左好憎佢，佢仲話大家不如攬住一齊死，今世做唔成情人下世都要繼續做。下？先生？清醒少少好嗎？玲姐都講得好清楚啦，有咩咁難理解呢？你殺左佢老公，佢好憎你，全世界都可以理解，但就係得你唔理解，咁一係你智商有問題；一係你個人真係好自大、好一廂情願、好唔理人、感受覺得自己諗既野岩曬其他人講既野根本聽唔入耳。無論係前者定後者都好，丁蟹俾我既感覺真係好似689。岩聽就聽，唔岩聽就叫你收嗲話你誤會左佢之後Non stop講佢既歪理仲以為自己講得好好聽。我每次聽到丁蟹/689理直氣壯講歪理都會心諗：你係咪on9？

而丁蟹四個仔都不相伯仲。第24集佢地迫賤婆婆返鄉下因為想搞方家，唔想賤婆婆阻住曬。賤婆婆大鬧佢地唔係人會有報應，因為方家對佢地有恩，佢地阿爺死，方家生養死葬；佢地細個冇錢食飯冇錢讀書，又係方家俾錢供書教學送衫送書。任何人聽到都知道方家有幾偉大，但，四個仔完全無動於衷，照夾硬送走賤婆婆，下一步就已經開始發動攻擊逐步迫死方家。佢地好似建制派班垃圾。任何情況下都對市民講既野充耳不聞，明明大家講既都係簡單到極既道理，意見合理易明，但佢地都好似聽唔明，繼續做佢地既陰質野。我覺得近幾年香港人花好多好多時間去同丁家解釋好多「阿媽係女人」既道理。三跑用唔到黎起飛唔應該起、政改方案唔應該通過因為唔係普選、好假既大陸技安唔可以有居留權因為佢係偷渡撚佢犯左法、自由行唔可以再加因為影響到香港人生活、地鐵唔可以再有加冇減因為香港人已經負擔唔到......仲有一千萬個咁樣既議案，係稍為有正常智商既人都知道唔應該做既事，政府全部做齊，一樣不漏。

香港人好似方家既一份子。有怕事既方芳同方敏；有曾經迷失但在大是大非前企得穩的方婷；有無畏無懼寧死不屈的玲姐同方展博；仲有捱義氣默默支持的慳妹同做實事搵人幫拖的龍紀文。好多香港人好有心，每次一有d有爭議既事，會寫長篇大論舉曬例子畫曬圖希望去說服一d唔係好清楚件事或者有有相反意見既人。但其實，個情況就好似方家同丁家講「你地真係好錯呀你地知唔知呀乖啦收手啦」，丁家一係聽唔明，一係扮聽唔到，一係聽到都覺得係你錯。好多好多新聞根本唔需要浪費時間去討論，但我地既政府就迫到香港人連「阿媽係女人」都要從多角度分析，再用例子說明，最好加埋比喻擬人排比頂真......中間又會有好多人跑出黎講下九唔搭八既野分散你注意力，霞姨又會搵幾個茄喱非出黎排下戲。當你已經解釋到筋疲力盡個時，佢就會一錘定音：「我覺得阿媽係男人喎」。討論結束。每一次都重複相同的戲碼。

而家劇情發展到丁家四子開始用各種方法騷擾方家，用騷擾其實太文雅，直接一點係要迫死佢地，其實真係有點不忍睇落去，因為真係會睇到嬲。早兩日第26集龍紀文聲淚俱下鬧班警察知道方家俾黑社會搞都唔幫方家，仲話要幫丁益蟹查下方敏係咪真係偷左佢隻錶，係度落井下石、蝦細路女，仲問佢地而家究竟係警察定黑社會，真係有一下錯覺眼前就係有班打人黑警俾佢鬧緊。我地而家身處既年代好似退化到返左去1993年，一個有人可以打橫行既大時代。雖然方展博最後算係贏左丁家，但佢贏之前其實已經失去得太多。但願香港人唔會輸到近乎咩都冇個時先可以反敗為勝。