少女旅行日記

少女情懷總是shit(一)我愛你你咪理

成日見到有人話「如果你男/女朋友中左以下幾多幾多樣,你就要好好珍惜佢」、「會點點點既男人嫁得過」、「肯陪你乜乜乜既女人娶得過」、「識咩咩咩既男人最型」、「如果搵到咁咁咁既女人就唔好放手」。每個人心裡面都有10000個理想另一半的條件,但現實其實係......阿姐鍾意既,就算佢乜都唔識兼完全唔符合條件,我都覺得佢最型最正。阿姐唔鍾意既,就算佢十項全能,係我眼中都不過係一個柒頭。你地話係咪喇?
好多人可能都問過「點解我咁好你唔鍾意我?」,跟住下一句就會係「男人不壞,女人不愛」。唔好意思,錯曬。一個人鍾意另一個人唔會係因為佢夠衰,冇人會話:「嘩條友咁仆街既正呀喂我就係鍾意壞人」只會係因為佢睇到呢個壞人有其他人睇唔到既優點,又將個種優點放到好大,大到可以掩蓋壞人既其他唔好,又或者佢同呢個壞人真係有d野好夾。至於一個人唔鍾意你呢個好人,都唔係因為「喂你咁好既我唔鍾意好人架咪過黎呀」,只係你既好唔係佢想要既野,你可能溫柔體貼,但佢想要既係風趣幽默,你既好對佢黎講唔重要亦冇吸引力。千祈唔好屈人地係因為你唔夠壞同太好人所以不被愛,如果你真係咁諗我會傾向相信係因為你柒所以人地唔鍾意你。

要鍾意你既人就算你淨係企係度呼吸,佢都會覺得你超正,「喂你會呼吸咁正既係型喎」,呢樣野冇理智可言。唔鍾意你既人,根本唔需要花心機去討好佢,就算你為佢上山下海佢都唔會識欣賞,仲會覺得你傻豬。時間有限,與其配合人地不如做返自己,多做自己鍾意既事,過自己想過既生活,自自然然會吸引到同道中人。人生徒勞無功的事情太多,做少一樣得一樣,唔需要因為人地唔鍾意你而唔開心,反覆思量邊個位出問題,鍾意就咩都係優點,唔鍾意就優點都變問題。或者調轉諗,如果個個都鍾意你,你咪好唔得閒?

愛情就係因為不可理喻,無法估計,先難得,先珍貴。

更多生活碎碎念相關文章