峴港本身冇咩景點，不過佢附近就有三個世界文化遺產，多數人都係由峴港出發再去，今次就先介紹其中一個－美山聖地(My Son Sanctuary)。由峴港市中心出發，車程約個半鐘。美山聖地其實係一個迷你版吳哥窟，都係擁有千幾年歷史的印度式古廟群遺跡，不過規模就比吳哥窟細好多，所以相對地冇甘有名。但其實美山聖地係東南亞一眾印度式古廟群之中最早建成，所以歷史價值好高的！！

美山聖地需要買票入場，$100000盾，即港幣$35。一入到去會見到有個表演台，有占婆族後裔跳下舞表演吹笛，觀賞價值一般。睇古跡之前可以睇睇個地圖，為左方便遊客參觀，古廟群分為唔同組別，H同L係仍然開發中，其他都可以睇。

越南中南部以前由印度教占婆王國統治，美山聖地就係占婆王國的統治中心，所以當時投入大量人力、物力建造神廟以展示王國的強大，最高峯總共有70座寺廟，不過經過戰爭洗禮，而家只淨返20座。A-D組係最大，比較多完整的古廟遺跡，其實都幾壯觀。大家可以欣賞到以前的神廟建築同埋入面的雕刻品。有幾座神廟都可以入去參觀，有零零落落的石磚同石雕擺設睇下。

另外G組雖然只有一座，但都幾宏偉。呢度神廟最特別的地方係所有石磚都只是堆堆砌砌就成了堅固的建築物，完全不需用鋼筋什麼什麼支撐，古代的建築都好勁。

E及F組就真係冇咩睇，得少少支柱同非常零碎都唔知係咩黎的部份。

美山聖地唔大，好仔細參觀都只需大約兩個鐘就行完。喜歡歷史、特色建築同影相的都可以來。遊人不算多，應該比吳哥窟好得多啦。要注意呢度真係好熱好熱好熱，而且完全冇遮冇掩，成個太陽在頭上，所以建議大家早點來啊～我是在38度的下午來......仲笑得甘開心，傻的嗎？

美山聖地(My Son Sanctuary)
地址：Duy Phu Commune, Da Nang
交通：建議包車，去埋會安。由峴港市中心作起點，車程約個半鐘。
開放時間：06:30am-16:30pm
入場費：$100000盾，即港幣$35