雖然檳城George Town係一個古城，大部份都係兩層高的古典屋仔，不過都有現代化的大型商場同高樓大廈。檳城最高的大廈叫光大廣場（Komtar Complex），1985年落成的時候有65層，曾經是政府部門及商用辦公室的落腳地，不過好多辦公室已經相繼搬走，人去留空。最近光大就黎個大翻新，在原有大廈加建3層，到68層高，將65樓變成室內觀景台，68樓就有餐廳同露天觀景玻璃步道，一齊上去從高空欣賞檳城啦！

從光大地下乘坐升降機上65樓觀景台，有趣的是中途會播放預先錄製好的景觀片段，拍攝角度一路向上升，所以會有種乘搭落地玻璃升降機的錯覺，很有心思！來到65樓會先看一段關於光大的介紹片段，之後就可以隔著玻璃窗觀賞檳城的景色。玻璃窗上會有些特別的地標介紹，還有一段的地板是強化玻璃，可以脫鞋走上去試試感覺如何，當是上68樓玻璃步道前的預習。其實都幾刺激架，好清楚見到腳下面的車同樓......

之後就上68樓啦，一出升降機係餐廳Coco Cabana Bar & Bistro，走出露天部份都有好多位置，可以一邊飲野一邊欣賞檳城景色。飲品不貴，特色cocktail都只需馬幣$20起，港幣$50左右，有埋呢個景色真的超值！

重點就係呢條Rainbow Skywalk啦！係咪睇到都覺得緊張呢？呢條彩虹天空步道全部都係玻璃，懸空於68樓，離地249米，行上去都咪話唔驚。行之前要穿鞋套，而且有人數限制，確保安全。站在檳城最高點，好離地又好有霸氣！360度從高空上睇的檳城景色好靚！其實呢種觀景大樓世界各地都有，我都上過唔少，我覺得檳城的景色都算特別，可能因為好多矮小的古老屋仔，好似lego，又有山同海，比一般好多高樓大廈的城市景靚呀。上65同68樓的門票馬幣$118，約港幣$270，都合理吧。

翻新了的光大並唔只高左，仲加建左新翼部份，多左好多好多野玩！有好多遊樂設施、水族館、7D影院、主題餐廳等等，岩曬一家大細。其中一個比較特別係侏羅紀恐龍研究中心，由室內行到去室外，係一個有故事的恐龍tour，沿途見到好多恐龍模型，都幾得意。出口附近仲可以騎電子恐龍......每個遊樂設施收費都唔一樣，都可以買day pass包曬所有，盛惠馬幣$150，約港幣$345。觀景台另外收費。新翼加觀景台的部份就叫The Top，而家仲有唔少正在興建中的新設施，大家拭目以待呢座新鮮的檳城地標啦！

The Top @ Komtar
地址：The Top, Komtar, Jalan Penang 10000 George Town, Penang
開放時間：每日10:00-22:00
65樓及68樓觀景台入場費：成人馬幣$118，約港幣$270
網址：http://thetop.com.my/
特別鳴謝：檳城旅遊局