布吉比較為人熟悉的是芭東海灘一帶，但少女就鍾情布吉的舊城區，除左有好多混合葡式與英式的復古建築物外，仲有好多cafe同小店，岩曬藝文青！今次我仲發掘左一間由當地人推薦的雪糕店同住左兩晚一間好少女風的平價旅館，一次過介紹俾大家啦！

舊城區所指的是Phuket Town裡充滿懷舊的兩層小屋個幾條街。大約係包括左Dibuk Road、Thalang Road、Satun Road同Phuket Road，中間仲有幾條巷仔。呢度的小屋好似檳城的George Town，原來係因為呢度正正係移居黎布吉的檳城人的集中地，難怪充滿檳城的影子。舊城區已經被泰國政府設為歷史建築保護區，所有歷史房子都可以保留落黎，大家可以好好欣賞每間古老房屋的設計和建築。

有唔少舊屋經過翻新之後變成賣手信的小店、cafe、餐廳同旅館。舊城區不算熱鬧，想在cafe裡享受一個寧靜的下午真的非常適合！每個週末的晚上舊城區都會有市集，大家不妨黎行下。

Thalang與Dibuk Road之間有條小巷叫Soi Rommanee，在泰語的意思是快樂巷。呢條巷的建築充滿葡萄牙風格，係個影相好地方。而巷子裡的Torry's Ice Cream就係當地人推薦我去的一間雪糕店。粉紅色的雪糕店室內走英式設計，典雅舒適，連menu都設計成英國報章的款式。雪糕都是自家製的，仲有泰國獨有的口味。老闆話O-Aew同A-Pong都係將布吉的特色甜品變成雪糕口味，前者有紅豆，後者帶有好香的椰子味，可以試食。

除左單球雪糕，Torry's Ice Cream仲有好多混合不同材料的創意雪糕組合同經典配搭，我點了Banoffee同Choco banana，兩款的主打雪糕係Banana butterscotch，好滑好香！加埋其他配料例如oreo餅碎同香蕉，勁夾勁好味！Torry's Ice Cream係間好創新好有誠意的小店，布吉每日都熱辣辣，黎呢度食雪糕係一個降溫好選擇。

離開蕭舊城區幾條街，大約5分鐘路程，仍然係Phuket Town的範圍，有一間彩色玻璃的旅館叫The Tint，係一間好少女風的平價旅館。Lobby有好多糖果式的裝飾同擺設，整個感覺好可愛，仲有postcard、雪糕同飲品可以買。地下層的客房門口牆身是彩色的，是少女們會喜歡的顏色啊～二樓和三樓都是綠色的。

房間都是糖果色系的，我住的是粉藍色，在網上見到仲有粉橙色呀粉紅呀粉綠色等等，空間都幾大，乾淨，基本設備都齊，有露台，但風景沒什麼特別。比較有問題係個淋浴系統，水唔係太穩定，時熱時凍，呢個大扣分。但點解都仲會推薦呢，因為好平，一晚房價只需港幣$265！！！兩個人住的話只需百幾蚊一個人，除左淋浴系統的問題，其他野都非常唔錯，職員都幾友善，隔離有商場，5分鐘路程仲有機場巴士站，性價比好高，所以如果budget唔多想搵平價住宿，可以考慮The Tint呀。

Torry's Ice cream
地址：16 Soi rommanee, Thalang Road, Phuket Old Town，Phuket, Thailand
營業時間：11:00-21:30 (逢星期一休息)
網址：http://www.torrysicecream.com/
https://www.facebook.com/torrysicecream

The Tint at Phuket Town
地址：2/11 Dibuk Rd. T.Taladyai Amphoe Muang Phuket, Phuket, Thailand
房價：標準雙人房由港幣$265起（官網比訂房網站貴）
網址：http://www.thetintphuket.com/