今次清邁之旅試左兩間當地出名的餐廳，完全唔同菜式、價位同style，不過都一樣好食，值得推介！仲有間甜品都好好食！

首先推介食法國菜的David's Kitchen，來頭不少，是連續幾年Trip Advisor 泰國排名第一的餐廳，好厲害的感覺。餐廳好靚，是玻璃屋設計，離市中心約15分鐘車程。

一入到門口已經見到現場有鋼琴演奏，氣氛好有情調，情侶來食特別浪漫！

首先會有一籃麵包，好多款。我點了兩個前菜都好高質，一個是帶子配蕃薯蓉，另一個是三文魚青瓜卷，兩個都好好食，材料新鮮，味道好fresh，配的醬又好夾，做前菜夠開胃。

主菜揀左安格斯牛排，配菜的薯蓉是精髓，勁香白松露味，又好滑。後來同侍應閒聊，佢話個薯蓉特別安排一個廚師負責整，佢成晚只會負責整呢個薯蓉，好認真！所以是餐廳其中一個推介。個牛排都不錯。再加一枝白酒，兩個人埋單港幣一千蚊，以這個質素來說是很合理的價錢，甚至比想像中平一點。

餐廳有些細節位也很加分，例如你訂了位，黎到會發現枱上有寫住welcome 你個名同你朋友個名的牌。訂個陣都覺得奇怪點解佢要問曬所有人既名，原來就係咁用。我地塞車遲左超過半個鐘，打電話去個陣佢地好好禮貌，又話唔緊要會繼續hold張枱俾我地。另外食完前菜，會免費serve你青檸雪葩，等你清一清味先食主菜，細心呀！！同埋侍應服務都超級好，同你有講有笑，好熱情有禮，經常都過黎問好唔好食，仲介紹我地附近有咩bar好玩，uber都幫我地call埋！最後最後，仲有thank you email。難怪會成為排名第一的餐廳，實至名歸，我誠意推介。

提提大家一定要上網預先訂位，因為好full的！而且星期日不營業。
David's Kitchen
地址：113 Bamrungrad Road, Wat Kate, 50000 Chiang Mai
網址：https://davidskitchen.co.th/

另外一間是地道泰北菜餐廳，叫Tong Tem Toh，在最熱鬧的尼曼路其中一條巷。雖然排名不高，但門口大排長龍，要知道清邁周圍都唔算多人，如果有咁多人排隊要食的話，一定唔會差！最後大約等左一個鐘先有位。

餐牌是一個驚喜，因為發現所有菜式都好平好平，每碟都只係大約15蚊至20蚊港幣，叫多幾碟都仲覺得好平。門口有人開爐燒豬肩肉，等位的時候已經覺得好香好想食，加埋個辣醬好惹味。其他菜都唔錯，特別推介龍鬚菜炒蛋，個菜好甜！兩個人食5碟野食加飲品，埋單每人只需港幣60蚊，呢個價錢超值！

餐廳環境都幾寫意，雖然好平，但又唔算係好頹個種小店，想食平價泰北菜可以一試，不過夜晚預左要等位啊。

Tong Tem Toh
地址：11 Nimmanhemin Road, Soi 13, Suthep Meuang, Chiang Mai
網站：https://www.facebook.com/TongTemToh/

同場加映多一間食甜品，叫Guu Fusion Roti & Tea，主打脆煎餅甜品。除左呢樣都仲有其他甜品、飲品同鹹點，不過我淨係食左脆煎餅。有好多口味選擇，我點左好經典的香蕉朱古力同芒果味，兩個都超級好食！主要係個脆煎餅真係好脆，我都係第一次食呢種甜品。香蕉朱古力比較甜，芒果就會清新D，各有各好食啊！餐廳會有茶免費提供，個人建議唔駛再另外點甜的飲品，飲茶反而可以清一清甜味。呢間餐廳在尼曼路，都幾受歡迎，夜晚要等等位，不過都快有位，有兩層，或者當下午茶食都不錯。

Guu Fusion Roti & Tea
地址：Nimmanhaemin Road Soi 3, Chiang Mai
網站：http://www.facebook.com/guufusionrotiandtea