上次介紹過一間市中心的平價正酒店，今次就介紹一間偏遠少少，但非常適合一班朋友或者成家人一齊度假的豪華別墅度假村－The Ocean Villas 海洋別墅。

The Ocean Villas離峴港市中心約20分鐘車程，離機場約40分鐘車程。出入基本上都要搭的士，reception可以幫手叫車黎到度假村門口接你，而返黎個時車可以入到去你住個間別墅的門口，懶人之選。另外，度假村提供一日兩班免費接駁巴士來回會安，時間大約係早上10點半同下午4點半，去到就原車折返，所以想去會安一日遊的話搭早上車之後約5點返黎就可以完全免費了。由度假村去會安約半個鐘，記住要先預留座位。

Reception就在門口，佢都係由一間別墅改建而成，成個度假村只提供別墅住宿，佔地非常廣闊，由我地住個間別墅行去reception要幾分鐘，行去餐廳公眾泳池個邊要多過5分鐘，懶人可以叫度假村的哥爾夫球車接送。

度假村的設計走大自然風格，一間間兩層高的別墅之間有好多樹，甚至有河流，環境非常寧靜同relax。

度假村的別墅由一房到五房都有，全部設有廚房同私人泳池，所以無論係想二人世界的情侶、家庭旅行、定好似我地甘一班朋友齊齊黎玩都好適合！我地今次住的係三房別墅，拎房時職員會帶你參觀同你講解下別墅內的設施，而家到少女帶大家參觀啦！

首先地下係客廳，飯廳同開放式廚房。客廳超級大，空間感十足！落地玻璃窗令感覺更豪華。廚房用具非常齊全，大家不妨一早去超市買定料返黎自己煮，就唔駛特登搭車出去食野啦！而且大家可以在度假村預訂BBQ食材，在別墅外的花園BBQ。我睇過menu，價錢略貴，可能一個人要幾百蚊先埋到單，但如果想足不出戶，又可以一班人開心BBQ跳起yeah，都不失為一個選擇。（我聞到對面屋燒得好香......）

客廳外面就係萬眾期待的私人泳池啦！！好啦老實說比想像中細了一點，水深0.5米，不要妄想可以游水，大概游兩下已經可以回頭了。不過我唔識游水所以沒關係，適合玩水就好了！泳池旁外有個小花園，仲有沙灘椅俾大家盡情曬太陽，環境非常不錯啊。不過別墅的私隱度很低，低到你可以隨意行過隔離的別墅花園睇人地玩水，偷人地泳池的水（是變態嗎？），而隔了條河的對面屋的情況也看得清楚。這點其實我們不太介意，因為沒有人會真的走來我們的別墅門口看我們玩什麼，不過如果大家想要私隱的話要注意一下。

走上樓梯來到樓上，就是睡房天地啦。3間房都有自己的浴室，設施和景觀略有不同，逐一簡單介紹一下吧。最大的主人房是雙人床，特別之處是有按摩浴池（我跟你說這個我親身試過真的好爽，會浸到唔想起身！！！）、有露台（可以坐，望到樓下泳池和對面的河與別墅）、有好大個浴室（有淋浴間）。呢個房最大，訓呢間房會好開心！

主人房對面的是較小一點的雙人床房，沒有按摩浴池也沒有露台。但有落地玻璃窗，景色也可以。浴室都幾大，有浴缸，沒有淋浴間。

在走廊另一邊盡頭還有一間兩床房，同樣沒有按摩浴池，有個小露台但只可以站著看看對面的別墅，那即是沒有景觀的意思。浴室是普通size，連浴缸都沒有只有淋浴間。所以最令人開心的還是第一間主人房啦！但整體而言對成間別墅還是很滿意，設施都幾新淨，又乾淨，入左黎就唔太想再出去玩了......

如果真係唔出去玩，度假村本身又有咩玩呢？首推當然是White Cap Beach Club的沙灘同泳池啦。由別墅行幾分鐘就到，呢個沙灘d沙好幼好幼，踩落去軟綿綿，而水都幾清幾乾淨，適合游水。度假村提供水上活動，不過我去個日唔見有人玩，但都幾多人游水。沙灘隔離係泳池，一個大人池同一個小朋友池，雖然唔係太大，不過可以望住個海游，感覺很不錯。

泳池旁有間半露天餐廳，係度假村裡唯一一間餐廳，環境好寫意，但食物就......我只食過早餐，質素一般。食物選擇正常，唔特別多，味道麻麻地，呢個位有少少扣分，完全唔係5星級度假村應有的早餐質素啊。

度假村仲有我最愛的spa中心叫Tides，價錢好吸引，最平百幾蚊就可以做到個treatment啦，最貴都只係400幾蚊，除左越南仲有邊度可以甘平？！諗起曾經係三亞做過接近1000蚊的spa，覺得自己以前真係好傻好天真。呢度間Spa中心細細間，環境寧靜，舒服到訓著。

Spa中心附近仲有個網球場，喜歡運動的可以去玩玩啊。同埋，仲有收費的cooking class，可以學煮越南菜！所以只留在度假村玩都不會悶。

總括黎講The Ocean Villas係非常值得推介的度假村，完全岩曬想過一個寫意假期的朋友。只要解決到食野的問題，我覺得留在度假村3日2夜完全唔出去都冇問題。如果夜晚會出市區食飯的話，那起碼要住4日3夜先夠享受，特別係一大班朋友入住真的好好玩！3房別墅的價錢每晚約$3300，6個人住每人$550好抵！其實間屋係夠住8個人架，如果有人唔介意訓廳同最大個間房訓3個人的話，就抵上加抵啦！一房別墅要$2000，兩個人住就相對冇甘抵了......不過我覺得呢個價錢可以住到靚別墅也很值得豪兩晚啦！

The Ocean Villas
地址：Truong Sa Street, Hoa Hai Ward, Ngu Hanh Son District, Danang
交通：機場搭的士約40分鐘
房價：一房別墅$2000；三房別墅$3300
網址：http://theoceanvillas.com.vn/