歐洲好似一個有隨意門的世界，只要你身處其中是但一個國家，個幾鐘頭飛機再加幾十蚊歐羅，就可以去到另一個風景截然不同的國度。你地估都估唔到，經過隨意門，布拉格下一站係阿姆斯特丹。

點解？話說我好細個就成日聽荷蘭呢個地方。因為我兩歲個年，曾經舉家移民去荷蘭，但大概逗留左一年左右，爸媽話唔習慣個邊生活又話香港生活好d就舉家又搬返黎香港，從此就777......所以嚴格黎講少女第一次搭飛機並唔係20歲，係兩歲。（BB旅行日記）我媽間中就話個陣荷蘭生活點點點，但我係完全冇印象既，不過我一直都好奇究竟呢個同我人生擦身而過的國家係點樣。我家3姊弟間中就會話我媽痴線，歐洲地靈人傑，去唐人街開間燒味餐廳，衰極都有間house住下，好搬唔搬竟然會搬返香港！！！我地有理由相信呢個係我媽做得最錯的一個決定。不過事到如今，我地一家命運已經完全改變，講多無謂，去紅燈區行下最實際......（故事簡直峰迴路轉）所以，20幾年後，我又再次降落荷蘭的土地上。

玩左幾日，覺得荷蘭係一個好特別的國家，佢將所有完全唔同風格既野集合於一身。佢有好童話的風車同miffy兔、有好浪漫的鬱金香同運河、有好健康的單車、有好多好學術的博物館、有好藝術的梵高、又有好邪惡的大麻同紅燈區。作為一個旅遊城市，特色景點多樣又豐富，絕對可以滿足各式各樣的遊人。

我去行左轉紅燈區，完全唔危險，大家都當景點。紅色燈的玻璃窗後有好多性感女子，佢地係度玩電話......er，咁冇客玩電話打發時間都好正路既，返工既人就係咁架啦。成街仲有好多sex toy shop呀睇sex show的bar呀妓女博物館呀咁囉，都有趣既。

呢度叫coffee shop的舖頭並唔係平時偽文青最鍾意個d cafe，係食大麻的地方，荷蘭食大麻係合法架，仲有用大麻整的蛋糕同糖。如果真係想飲咖啡要去返叫cafe的地方，唔好亂入呀細路。市中心的coffeeshop好似7仔咁多，每次經過都聞到大麻味，搞到我個鼻好痕......
市中心最多係運河同博物館，但我最深刻反而係Vondelpark，阿姆斯特丹最大的公園，環境好優美，好多草地好多湖，可以踩單車又可以野餐。有日搵唔到電車站於是死死地氣行返airbnb間屋，途經Vondelpark，咁岩係日落時份，但個天唔係橙黃色咁簡單，係仲有紫色再加粉紅色！！！現場勁多路過的人都驚呆左，停低曬影相，真係好靚好靚。呢種風景係好偶然遇上的驚喜，冇得主動去尋找，本身行路行到好頹，之後覺得好！幸！福！行路所睇到的風景真的隨時超乎你想像，真的超美！

今次黎荷蘭仲有個新體驗，就係住airbnb，之前大阪住過係冇見到屋主既，今次係同屋主一齊住。屋主係個靚靚的女歌星同演員！佢好nice，仲有隻可愛貓仔，不過我日日早出晚歸好少見到佢地。間屋都幾靚，好大，有3間房，佢自己一個住，用黎做airbnb真係非常good fit。住呢間屋個感覺好地道，每日返黎都覺得自己好似拍緊歐美電視劇......不要ff太多好嗎？價錢大約$700蚊晚，唔可以話好抵但都值既，阿姆斯特丹物價比較高。去市中心要搭15分鐘tram，屬於一個寧靜的小社區，強烈推薦大家去歐洲住當地人的家，住大屋呢d機會都係得發夢同旅行先有機會發生。想知道屋主的聯絡方法可以pm我。

總結荷蘭同其他歐洲國家好唔一樣，佢唔係sell華麗古蹟，就算佢想sell都冇人會理佢。佢的吸引力在於一種難得的自由開放社會氣氛，性同毒都可以放在陽光底下光明正大，對好多生活得好壓抑的人黎講係天堂。荷蘭係個好地方，我再次肯定我媽當年放棄移民荷蘭呢個決定係錯既，如果命運能選擇......可能有屋租出去俾人住airbnb的就係我......byebye荷蘭少女。