位於意大利的五漁村（Cinque Terre）又稱為五鄉地，是一個國家公園，也是世界文化遺產。近來變成熱門景點，五漁村的特色在於七彩的房屋建立在懸崖上或海邊，總共有5條村，由北至南是Monterosso al Mare, Vernazza,Corniglia, Manarola 和 Riomaggiore。慵懶少女選擇參加travelwebsite.com的一日團，早上8點在佛羅倫斯Santa Maria Novella中央火車站集合出發，坐旅遊巴兩個半鐘就到啦。如果自己去要搭火車又要轉車，都幾麻煩，所以我都建議大家參加一日團。呢個團有好多來自世界各地的團友，好似聯合國，耳邊有好多不同的語言，佢地都好nice，成個團氣氛好熱鬧。

遊五漁村較佳的季節是夏天，因為位處高山和海邊，冬天會好凍好大風，海景都有差別。但暑假會好多好多人，所以初夏或者9月又會比較好。遊玩方式通常都係順序玩，由邊條村開始都可以，順序去曬5條村。個團包左一張火車pass，可以一日裡任搭火車。自己買要歐羅12蚊，差唔多港幣$100。

我地由Vernazza開始，呢條村係第2細，特色係見到好多梯田，五漁村唔少居民都係務農為生，佢地要在陡峭的山坡上種植，所以出現梯田，可以見到好多植物。導遊沿途都有介紹五漁村的歷史同不同植物種類。

Vernazza唔大，行左一陣之後就搭火車去Corniglia。個車站在海邊，靚到飛起！幾分鐘就到啦，五漁村每個站都只係相隔大約幾分鐘。Corniglia係最細的一條村，但由火車站行上去就先要行百幾級樓梯......辛苦完就係lunch時間，可以自己搵餐廳食，亦可以跟導遊去佢推介的餐廳，我就跟佢同埋其他團友對住個海食左個lunch，一齊傾下偈，好寫意。

食完之後就集合返大家，開始艱鉅的任務，行山！由呢度行去下一條村Manarola，行左差唔多一個半鐘，有少少辛苦，堅係行山路，唔算係好輕鬆個種步道，但風景非常非常靚，左手邊一路都係無盡頭的蔚藍大海同埋遠距離見到Corniglia山頭的一排彩色小屋。沿路都好多行山人士，我都會建議大家黎行下山，呢個都係遊五漁村一種好方法，可以從另一角度欣賞美景。

終於行到Manarola啦，佢係最多遊客的一條村，密集的彩色小屋好童話！仲有可以落水玩的海灘，成個氣氛都好relax，難怪受歡迎，意大利本地人都好鍾意黎度假。由行山開始都算係自由時間，總之集合時間前大家都可以自由閒逛，在海邊hea或者去廣場的餐廳飲杯野同逛逛小店都可以。

之後又一齊搭火車去最北的Monterossoal Mare，呢條村海岸線比較長，好多人會曬太陽同落水。但除此之外呢條村好似最唔特別，不用留太久。

最後就搭船去Riomaggiore，船票已包。因為由最北去最南，大約20分鐘的船程可以遠眺全部5條村的景色。Riomaggiore是明信片上經常出現的景色，繼續是自由時間，在廣場裡的彩色屋之間穿梭好開心，幾多特色小店。

我最鍾意呢個一日團就係有搭火車有搭船有行山，咩方式都試下。如果我自己黎，可能只會一直搭火車穿梭5條村，因為我見網上大部份blog都係叫人搭火車，其實真係應該搭埋船同行山。每條村風景都略有不同，一次過感受不同風格的漁村。最後大約6點幾就回程返佛羅倫斯，9點左右返到朝早出發的車站，一日團的時間安排得不錯，推介。

travelwebsite.com五漁村一日團詳情：
https://travelwebsite.com/LocalTour/LocalTour/Details?themeId=621&rank=1