距離慕尼黑大約3個鐘車程的國王湖是德國一個好著名的湖泊，因為湖水呈現翡翠綠色，清澈見底，而且被群山包圍，景色非常靚。德國政府為左維持國王湖的水質，規定只有手划船或電動動力船先可以在國王湖上行駛，據說國王湖的水質已達飲用水的標準，不過我當然唔會試，但就山長水遠黎到呢個湖欣賞一下。

遊湖方法當然就係坐船啦，講德文的導遊叔叔會一路介紹周圍的景色，但當然我係聽唔明。叔叔似乎成日講笑話，見到同船的人都笑得好開心，嗚嗚，我都想聽得明德文......好啦我唯有自己睇風景。睇下水又睇下山。個湖真係好大好大，風景非常壯觀。而導遊叔叔會在航程中途拎個類似喇叭的樂器出黎對住群山吹奏，大家就可以聽到來自山谷的回音，好正！

船程中間有2個上落站，第一個站就係St. Bartholoma，大家會見到湖邊有一座好可愛的紅色圓頂教堂，中文係聖巴多羅買教堂，外形關係又稱為洋蔥教堂。教堂個名取自耶穌十二門徒之一的聖巴多羅買，裡面開放參觀，不過好細，好快睇完。

從教堂旁欣賞國王湖又是另一種風景，水真的好好好綠，好清，仲有好多可愛鴨仔游水添！

教堂附近有幾間餐廳，有一間專賣魚，我就試左啦。佢賣幾種唔同的魚，我都唔識分，就隨意揀左一種，原條上好搞笑，味道也不錯，可以一試。

食完之後再搭船去到第3站Salet，呢度最著名係一個叫Obersee（上湖）的湖，我最初都係因為見到呢個湖的相覺得太靚啦，所以好想黎。呢度真係一個世外桃源，風景非常非常優美，感覺好恬靜好忘憂，完全是那種有洗滌心靈作用的地方。（但遊人有點多，就破壞了寧靜......）

然後又坐船回去啦。其實國王湖除左欣賞湖景，呢度仲有好多行山路線，適合喜歡行山的人。我黎個時就遇到一個德國人，佢黎國王湖就係準備行3個星期山......但因為由慕尼黑出發黎國王湖需時太耐，如果想行山可能要考慮住附近先夠時間。在網上看到國王湖冬天落雪時的相覺得好靚，大家都可以考慮冬天黎呀。

國王湖 Konigssee
交通：由Munchen Hbf出發，搭火車到Berchtesgaden再轉839/841/843巴士到國王湖（火車要轉車）
網址：http://www.koenigssee.com/