德國之旅由慕尼黑開始，講到慕尼黑，最出名應該都係啤酒。想飲正宗慕尼黑啤酒，一定要去市中心一間啤酒屋，呢間啤酒屋非常巴閉，因為佢係全球最大啤酒屋，可以容納3500多人，而且有超過400年歷史，絕對係慕尼黑必定唔可以錯過的景點！

一入到去HB皇家啤酒屋（Hofbräuhaus München）已經感受到超熱鬧氣氛，全場坐無虛席，可以同3000幾人一齊飲啤酒，呢度根本每日都係啤酒節！啤酒屋裝修好靚，人好多但樓底好高所以極具空間感，一點都不覺得擠迫。拱形天花板有好多壁畫同掛燈，枱櫈都是木造，加埋侍應都係著巴伐利亞傳統服飾，充滿古典歐陸風情。

啤酒屋仲有現場樂隊表演，同埋有室外的部份，個人覺得坐室內氣氛好一點但會比較嘈，自己隨意搵位坐就可以啦。

個menu都好靚，入面有講啤酒屋歷史，有個網上版，大家可以上網睇下有咩食。ONLINE MENU LINK

重點來了！呢度既啤酒全部都係一公升一杯架！就甘睇睇唔到有幾大杯，於是拎佢同部iphone比對下，再同我個頭比對下，大過我個頭呀，真係好大杯架！！！（仲好重）啤酒有幾種揀，我揀呢隻係溝左檸檬汁，有少少甜味，都幾好飲。

另外啤酒屋仲有好多野食，點左個薯仔湯，個湯加左好多雜菜，口感好豐富。主菜點左德國腸加薯仔沙律同烤豬加薯仔球，腸仔同烤豬都好食，烤豬個汁唔錯。個薯仔球好得意，佢既質感係好煙韌的，同一般入口就溶化的薯蓉口感好唔同，但味道我記得係麻麻地，個薯仔沙律都係。

最後仲有甜品，雲喱拿蛋糕Homemade steamed dumpling，口感似麵包點雲喱拿醬，味道都OK。如果大家對食物唔係太有興趣，都可以飯後黎飲杯啤酒，感受下熱鬧歡樂氣氛！

Hofbräuhaus München
地址：Platzl 9, 80331 München (慕尼黑市政廳附近）
營業時間：星期一至日 9:00-23:30