少女旅行日記

北海道

[北海道] 星野渡假村 玩樂設施及景點篇 必看壯觀雲海與水之教堂

上一篇介紹過星野渡假村(Tomamu)的客房同餐廳有幾正啦,今次就會講下渡假村有咩玩啦!夏天同冬天的星野渡假村係完全截然不同的風景,無論睇定玩都好唔一樣,今次少女係夏天去既,而其中一個夏季限定景色就係傳說中的雲海!呢個景象只在5月中旬至10月上旬有機會睇到,而且需要相當的運氣,睇唔睇到完全視乎當日天氣狀況。
凌晨4點左右就要出發搭纜車上山,山上氣溫好低,我去個日係6月亦只有1度,大家要準備足夠禦寒衣物,而纜車終點站都有風褸可以借。上到海拔1296米的雲海平台,只要等到霧氣消散,就會漸漸見到雲海。如果運氣好就會見到以下呢個壯觀雲海。
但我去個日只見到遠遠的雲河,同想像中的雲海相差甚遠。人生有好多風景都係可遇不可求既,雖然冇雲海,但其實山上風景都好靚,上黎睇雲層變化都值得。
呢個係2015年先建成的雲海展望台,凌空興建的設計,雲海出現個陣行出去就會有企係雲上的感覺,希望你地去的時候可以見到真正的壯觀雲海,一定好靚架!
另外,雲海平台上有間賣明信片的店,係呢度寄明信片仲唔駛貼郵票添!我就寄左張雲海明信片俾自己啦,一個星期左右就收到!仲有個露天咖啡廳,可以一邊飲杯熱飲溫暖下,一邊欣賞雲海景色。
另一個夏季限定的活動就係好刺激的漂流啦!漂流地點係離渡假村約半個鐘車程的鵡川,報名之後會有教練車你去換衫同帶你去玩。少女漂流的故事係好驚險的,因為途中架艇撞石反左(好似鐵達尼撞山呀Jack),我!跌!左!落!水!而我係唔識游水既,完完全全唔識個隻。水流太急乜都捉唔住,水浸過頭個下我以為自己要死。(小姐你有救生衣架其實)係喇,credit俾返救生衣,幾秒之後就浮返上黎。但都勁驚恐,因為知道再唔上返架艇隨時會被水沖去。死攬住隻艇對抗水流,等教練救我,弱弱地叫了一句help,教練終於救返我。呼~之後繼續係漫長的漂流,無限個旋渦,水花四濺100次之後終於玩完。全程大概漂流左40分鐘。
大家睇相應該都會感受到個種驚濤駭浪,我自己睇返都有少少打冷陣......不過都真係一個難忘經歷,喜愛刺激的朋友應該會好鍾意玩。
玩完刺激的,係時候靜靜參觀渡假村裡一個莊嚴的景點,就係由世界級建築師安藤忠雄設計的水之教堂。教堂採用與自然共生的概念,由「水、光、綠、風」等自然元素結合,成為一座同優美大自然融為一體的浪漫教堂。十字架建在平靜湖泊上,如在水中央。教堂被青蔥樹林包圍,一呼一吸都是純粹的大自然氣息。水之教堂的氣氛跟一般結婚教堂的感覺很不同,有種沈實的浪漫。教堂每天一早一晚各有一段開放時間,我早晚也去過,建議大家還是早上去比較好,晚上感覺有點......自己看相吧。
台灣歌手梁靜茹曾經在水之教堂拍MV,首歌叫崇拜,大家可以睇睇MV裡的教堂。LINK
同水有關的仲有永渡假村內一個室內人造浪泳池叫微笑海灘 Mina Mina Beach。佢係全日本最大室內暖水池,全年水溫保持28度,就算出面落雨不怕落雪也不怕,冬天夏天都玩得。最正係泳池每隔半個鐘就有人造海浪,好似我一樣唔識游水就可以租水泡玩,呢度有好多唔同種類的水泡同浮床俾大家租借,好貼心。我攬住個水泡在泳池浮浮沈沈左成個鐘唔捨得走。
而泳池周邊有好多小玩意,有按摩池、兒童池、彈床、仲有教你整雪糕的workshop,我就試左整啦!味道唔錯架,想唔想試下?
泳池隔離仲有一個露天溫泉叫木林之湯Kirin-no Yu,入面唔俾影相,但景色係非常非常靚,所以我特登從官網搵左張相俾大家睇。呢個溫泉係望住森林浸架!冬天就望住雪景,好正呀!!
除左以上特別推介的景點同活動,星野渡假村仲有好多好多野玩架,哥爾夫球、熱汽球、獨木舟、踩單車、做SPA等等,動靜皆宜。而冬天就會有滑雪場,又有一個名為愛絲冰城的Ice Village,有好多用冰整出黎的設施包括冰之酒吧、冰之咖啡廳、冰之教堂、冰之飯店等等,仲有溜冰場!所以無論咩季節黎,節目都一樣豐富,有排玩!今次夏天黎到渡假村,少女最深刻係呢度成個環境都被森林包圍,間中隨意走出室外散散步,放眼都係無盡的樹木同山景,氣氛超級寫意,心情好放鬆。到冬天個時,今次見到的青蔥森林、翠綠山景將會全部變成白茫茫的雪景,想像下都覺得好浪漫呀,非常希望冬天可以再訪星野渡假村,感受北海道的另一面!
北海道星野渡假村 4 日 2 夜套票 (每位$4,888+)
詳情:PAM Holidays 北海道星野渡假村套票
星野渡假村客房及餐廳篇:LINK
廉航平價飛北海道:LINK

更多北海道相關文章

更多日本相關文章