街市不嬲都係一個好易被遺忘但其實又最多好野食的地方！好似香港，其實好多街市的熟食中心都有好多好地道的美味菜式，不過遊客就真係好少會知道啦。所以去旅行識食一定要去人地既街市，就可以搵到最新鮮最好味既地道野食啦！大阪的黑門市場就係其中一個收埋好多好野食的街市！

日本出名乾淨，連街市都唔例外，完全唔會有濕漉漉既地下或者無啦啦見到地下有條菜。哈哈，所以逛得非常舒服。呢個市場真係應有盡有，大約170間舖包括海鮮、刺身、生果、零食、花店、雜貨店。仲有好多熟食例如天婦羅、關東煮、拉麵、串燒、炸雞等等。無論係想食野、買新鮮食材定手信都全部可以滿足得到。

呢度真係太多選擇，花多眼亂，所以今次精選左3樣必食推介俾大家。

（一）前菜：海鮮串燒
呢檔海鮮串燒好多人排隊，本身都有賣海鮮，不過似乎冇人理佢地賣既海鮮，個個都係食串燒。哈哈，一定要試燒帆立貝串，超新鮮，醬汁好惹味，係食完想再食的高質素。價錢：350YEN 一串，有4粒。

（二）主菜：壽司＋魚生飯
呢間係堂食的，試左幾款壽司同一個三文魚魚生飯，全部都好好食，魚生好新鮮。價錢忘記了，但不貴的。壽司師傳超親切，主動話要幫我地影相添。

（三）甜品：草莓麻糬
最念念不忘之選。麻糬勁大粒，皮的厚度適中，好煙韌，入面粒士多啤梨好甜好好食！有幾隻口味，臨走前忍唔住返轉頭再買多幾粒。價錢：195YEN一粒

其實一路行都仲有好多野想食，特別係好多魚生超吸引的！不過去個日又唔太肚餓所以好多野都冇試到，下次一定會留定個肚去食餐勁！每間舖頭的營業時間不一樣，多數都係黃昏前就收檔，建議中午去當食lunch就岩啦。

黑門市場
地址：大阪市中央區日本橋2-4-1
交通：地鐵日本橋站10號出口行5分鐘
網址：http://www.kuromon.com/