<<愛麗絲夢遊仙境>>是我好喜歡的迪士尼卡通片之一，我相信每個少女心中的都有個wonderland，裡面收藏了我們最珍而重之的回憶、一直小心翼翼守護住的夢想、也有一個堅強、善良又勇敢的自己，像女主角Alice一樣。今次來到大阪，知道有一間以這卡通做主題的小店，當然要去朝聖！

Alice on Wednesday在人氣購物旺區心齋橋的一條小街中，雖不在主街但也不算難搵。門口非常特別，有幾個不同size的門，而正門更加係超迷你，好似係俾飲藥水變小左的Alice入去甘，我地都要彎低身先入到，好童話！

店分兩部份，一部份係以紅心皇后做主題，裝潢都以紅色同黑色為主，燈光偏暗，帶點神秘同華麗的感覺。主要賣<<愛麗絲夢遊仙境>>的精品同首飾。首飾個部份好吸引，因為好精緻而且價錢好合理，大多唔駛100蚊就有，好抵買。款式會有Alice套戲入面常出現的角色同圖案例如趕時間兔仔、妙妙貓、鐘、啤牌、鎖匙等等。至於精品就有文具、杯、化妝袋、布袋之類。

而店的另一部份係完全相反的感覺，以白色做主調，好光猛，同頭先個邊形成強烈對比！呢邊既設計令我諗起Alice同帽子先生一齊食下午茶既畫面，最特別係天花板有倒吊的枱櫈同下午茶茶架。呢邊就係賣食物的，有曲奇餅、糖、朱古力、爆谷，仲有香檳。曲奇餅的造型好得意，有蘑菇、貓、啤牌。而其他野食就只係包裝有Alice剪影。價錢會稍為貴少少，但買黎做手信都不失為好選擇！

Alice on Wednesday在在日本總共有3間分店，名古屋係第一間，之後就係大阪呢間，最新個間今年東京都已經開左啦！少女們記住去尋找你的wonderland呢！

Alice on Wednesday
地址：大阪市中央區西心齋橋 2-12-25 朝日廣場心齋橋 1F
交通：地鐵心齋橋站7號出口步行5分鐘
開放時間：平日11:00-19:30/ 星期六、日 10:00-19:30
網址：http://www.aliceonwednesday.jp/