去東京好多人都淨係諗住行街買野，如果唔鍾意買野而鍾意睇風景可以去邊？其實近郊有好多適合一日或兩日遊的特色小鎮，鎌倉就係其中之一。如果有睇過電影《海街女孩日記》應該會對鎌倉有印象，因為主角幾姊妹就係住鎌倉。由東京市中心出發，搭一個鐘JR就到鎌倉。想暢遊鎌倉市內不同景點就要再從JR站搭名為「江之電」的電車啦。

我的一日遊路線係先遊覽JR站附近一帶的小町通同鶴岡八幡宮，之後搭江之電去鎌倉高校前站睇卡通片《男兒當入樽》的場景，之後行去電車前一個站七里之濱食bills pancake，再搭返江之電去JR站返東京市區。呢個係一個超級輕鬆寫意的行程，如果天氣好我會建議大家預留多兩個鐘去埋江之島遊覽同睇日落，都係搭江之電會去到。不過因為我去個日係陰天又超多雲，估計唔會睇到日落，所以冇去江之島，全程大約有5個鐘留在鎌倉。
首先從JR鎌倉站一出就會見到小町通，一條有好多商店同餐廳的街。有宮崎駿卡通的精品店、賣手信、小食的店，覺得唔算多野行。其中有間賣綠茶雪糕的店好多人排隊，因為佢個綠荼正糕可以揀濃度的！仲有兩款唔同濃度的綠茶軟雪糕，加埋綠荼粉，好好味～

行完小町通之後就會去到鶴岡八幡宮，鎌倉最有名氣的神社。門口有好大個鳥居，穿過鳥居有條小型拱橋，名為太鼓橋，不過遊人唔可以行上去，只可以行兩邊的路。行一段路會見到前方有個舞殿。左邊有一排貢酒，好壯觀。之後再行一條長樓梯就會去到正殿，可以入去參拜。鶴岡八幡宮係日本3大八幡宮之一，仲係關東的總守護神，係保護國家的神社。左邊有賣御守同繪馬的地方，日本每間神社的繪馬都唔同，呢度係白鴿造型的。

正殿左邊會見到有個小鳥居，行上去發現有一排小鳥居，原來呢度有另一個神社叫丸山稻荷社，係八幡宮中最古老的室町時代建築物。

參觀完神社就行返轉頭去JR站搭江之電啦。今次唔行小町通，而係行鶴岡八幡宮前的表參道，兩旁種滿櫻花樹，如果櫻花季黎就會好靚。

日本的電車真係好靚，江之電的感覺好復古啊！江之電行駛路線會經過海邊，風景好正。而且路軌就在行人路旁邊，所以行行下江之電就會在你身邊經過，感覺好有趣。

搭江之電去到鎌倉高校前站，一落車行幾步就會見到有群人聚集，因為黎到卡通片《男兒當入樽》的場景啦！！！就係呢個有電車又有海景的畫面啦，櫻木花道你在哪？不過我記得我以前係鍾意流川楓架......個卡通畫面係有電車經過，所以大家都會好期待捕捉電車經過的一刻，仲要係從左邊黎的電車先岩方向架。但我去個日天氣真係爭左少少，冇個種有藍天同海景好清晰的畫面。

之後的目的地係位於前一個站七里之濱食下午茶，如果大家想順路一點都可以去完七里之濱先過黎鎌倉高校前。兩個站相隔唔算太遠，所以選擇散步去而冇再搭電車。沿路都好舒服，有時會見到海景，有時會行小巷，都好易行，15分鐘左右就到。

黎呢個站最主要目的係食bills的pancake！電車站向海邊行3分鐘，見到相中的建築物就係啦。來自澳洲的bills擁有「世界第一早餐」的美譽，東京有幾間分店，表參道、台場、橫濱都有，鎌倉呢間最大賣點係有室外座位，可以望住個海景食野，景色好靚！！！我去的時候大約4點半，唔駛排隊，不過室外位full左，得3-4張枱。聽講早上同中午都幾多人排隊，所以建議大家都係4點後黎食下午茶啦。室內位都好舒適的。香蕉蜜糖奶油pancake係必食推介，真係世界級呀！！！佢係我暫時食過最好食的pancake，口感同一般pancake都幾唔同，比一般厚但好柔軟，有入口即溶的感覺，香蕉、蜜糖、奶油個組合味道好夾，甜而不膩，係一定一定要再食的質素！我個人對食都冇咩要求，好少極力推介一樣食物，bills呢個pancake我真係大推！（後來知道福岡都有，正呀，因為我將會去，好快又可以食到啦yeah～）

bills對面係一個無敵海景，仲可以見到江之島添！再提議一次，天氣好可以去埋江之島。好鍾意鎌倉的寫意氣氛，度假一流，同人多擠擁的東京市區截然不同，離市區又唔遠，值得一訪。