日本麻，好多野都好好食。本來就好鍾意食日本野，所以今次旅程都冇特別指定要去邊間餐廳食，基本上係行到行到邊食到邊，隨便入一間店都覺得好好味。唯獨呢一間係我指定要去的，因為在網上見過佢個巨型pancake就念念不忘，所以佢都係今次日本之旅其中一個期待位。食完之後係點？唔好食我就唔會寫呀！！！

Eggs'n Things來自夏威夷，在日本有幾間分店，據說排隊情況一樣嚴重。大阪那間在人氣旺區心齋橋，不難搵。我平日下晝4點半到，大概等10張枱左右，其實都唔算排太耐，半個鐘左右啦！而且有menu睇住先，侍應仲會介紹下有咩好食，所以唔會覺得排左好耐。不過就冇得拎飛，係一定要企係度排。我地食完出黎大約6點半，已經冇人排啦！應該因為野食唔太岩做晚餐吧。

間舖都幾大，有分室外位同室內，室外得幾張枱，室內大好多，裝潢走簡約舒適路線，白色為主，沒有太多擺設，好光猛。侍應好親切。不過日本侍應好親切是常識吧。記住問佢地拎英文menu啊。

食物方面呢主打當然係pancake！有多款口味，同埋可以揀加多種配料。但我目標明確，所以都冇特別睇其他口味，就叫左個超多cream香蕉pancake。如果你唔太鍾意食cream，好似有個少cream版揀的。見到實物真係幾震撼的哈哈！記住影幾張相好喇，因為佢d cream好快會塌。真係好好好好味！！cream好滑好香，pancake好鬆軟，有堅果豐富口感，仲有少少芒果汁同果粒又幾夾。另外枱上有3種醬俾大家自己配搭包括草莓、椰奶、楓糖，我個人比較楓糖醬。總之真係好好食，係必然要下次再黎食的程度！我會建議兩個人share一個，因為有成6塊pancake，再加甘多cream都真係幾濟。但現場所見好多人係一人一碟的！！！仲係女仔！！！（覺得難以置信）

Pancake之外，仲有鹹點，係好早餐類的東西，例如煎蛋炒蛋、薯仔粒、午餐肉、煙肉、奄列等等。太多選擇唔係好識揀，見隔離枱個碟賣相幾好於是跟人地點，叫左碟有煎蛋、午餐肉同薯仔粒的，又係好好味！午餐肉煎得勁勁勁香。薯仔粒加左少少黑椒，超好味！

食物價錢略貴，最基本一份pancake大概1000YEN，早餐類也是差不多，飲品450YEN左右，沒有套餐全部要散叫。但以這個質素，我覺得價錢可接受啊，真的值得一試。

Eggs 'n Things 心齋橋店
地址：大阪市中央区西心齋橋2-10-2CriceNikko西心齋橋1F
交通：地鐵心齋橋站7號出口步行5分鐘
營業時間：9:00-22:00（Last Order 21:00）
網址：http://www.eggsnthingsjapan.com/store/shinsaibashi.html