少女旅行日記

韓國首爾 | 韓國普羅旺斯 Heyri文化藝術村 韓劇迷必遊的南法小鎮

亞洲地區有好多歐陸式小村落,以歐洲唔同國家做設計藍本,令大家唔駛用好多錢搭飛機去好遠已經可以感受到歐洲氣氛。除左之前介紹過的小瑞士村外,位於首爾近郊,同樣係京畿道範圍內的坡州亦有另一個仿歐洲童話小鎮的景點,普羅旺斯村,一個充滿南法風情的小鎮。大熱韓劇《來自星星的你》都係呢度拍架!都敏俊si~(我已經唔鍾意你了,我新寵係劉時鎮大尉)
仿歐洲的景點通常都有一個特點,就係好多好多七彩繽紛的屋仔,令你感覺置身童話世界裡,成個感覺都好歡欣好夢幻,似乎歐洲同童話係畫上等號。普羅旺斯村都唔例外,每個角落都係少女影藝文青相的好地方。七彩屋仔好靚,周邊裝飾都好靚,少女們一定會好鍾意呢度。
除左歐陸建築之外,普羅旺斯村充滿悠閒寫意的氣氛,因為周圍種滿花草,環境又空曠,比起首爾市中心,呢度真係一個寧靜的世外桃源。
普羅旺斯村有唔少商店同餐廳,有各式各樣的小店,又有賣家居用品、雜貨的大店,都幾多野可以睇。影下相行下舖頭,可以消磨到兩、三個鐘左右。
首爾市中心出發,搭地鐵去到合井站2號出口,轉坐2200號巴士,大約40分鐘就到「城東十字路口」站。落車見到對面有座古色古香的建築物,沿左邊的斜路上山,途中會見到一架巴士cafe,大約行10分鐘見到粉紅色屋仔就到普羅旺斯村啦!
而普羅旺斯村附近仲有另一個景點叫Heyri文化藝術村,由普羅旺斯村行大約20分鐘就到,我都有去逛逛。Heyri文化藝術村好大,好多個入口,裡面有各類型博物館、體驗館、畫廊、書店同cafe,係一個真。文青地方。呢度的建築物造型都幾特別,本身已經係一件藝術品啦,而且幾乎冇商店,真係一個純料文化藝術體驗的景點,感覺毫不商業。藝術村唔收入場費,不過入博物館就要收費,每間收費唔同,有韓國近現代史博物館、電影博物館、玩具博物館、3D藝術館等等。好似入場可以買唔同的套票,包左唔同博物館的入場費,大家可以根據喜好買套票。
Heyri文化藝術村維持著與大自然共存的理念,所有建築物唔可以起超過三層樓以上,整個環境都係好舒適空曠,天空都特別廣闊。呢度都係好多韓劇的取景地,包括《秘密花園》、《紳士的品格》、《花樣男子》等等,韓劇迷會好有親切感。
特別想介紹藝術村裡一間餐廳,叫ADAMAS253,我係俾佢外型吸引左入去既,設計好特別,而裡面樓底高,空間感好重,有d藝術裝飾品,窗外景色一片和諧,有格調得黎又不失寫意氣氛。餐廳以西餐為主,質素唔錯,少少貴,主菜平均過100蚊。後來我先知《來自星星的你》都曾經黎過呢間餐廳拍,究竟全首爾有幾多同都敏俊si有關的景點?
如果會睇下博物館的話,文化藝術村可以行好耐架,加埋普羅旺斯村就已經可以行大半日。其實附近都仲有多一個景點叫坡州英語村,又係有好多仿歐洲建築,但就唔係走童話風,而係提供學英文的體驗環境,令人可以在一個似外國的環境學外語。但誰要去韓國學英文了......我就唔太有興趣啦,冇去到。另外2200號巴士會途經坡州outlet,我有去呀,但就覺得冇咩野睇啦,零收獲。不過我成日覺得去outlet買唔買到野好講運氣,祝你好運嚕。
普羅旺斯村
地址:京畿道坡州市炭縣面城洞里82-1
交通:地鐵合井站2號出口,轉坐2200號巴士於城東十字路口站落車
開放時間:星期一至日10:00-22:00
網址:http://www.provence.co.kr

Heyri文化藝術村
地址:京畿道坡州市炭縣面Heyri村街82-105
交通:地鐵合井站2號出口,轉坐2200號巴士於Heyri站落車
開放時間:逢星期一不開放,每間博物館開放時間不一樣
網址:https://heyri.net/

更多首爾相關文章

更多韓國相關文章