韓國釜山 | 最期待的釜山景點 甘川洞文化村 遍佈山頭的彩虹屋仔
如題，這次去釜山除了櫻花外，最期待就是這個景點。之前無意中在網上看到一張整個山頭都是彩色小屋的相，壯觀得黎又充滿童話風，已經下定決心要親身去一次。然後機會黎喇飛雲！終於真係去左甘川洞文化村，呢度係一個好適合少女的景點，氣氛好有愛好lovely，係喇就係呢種感覺喇！！
去甘川洞文化村要搭小巴，在地鐵土城站6號出口行幾步到釜山大學醫院癌症中心門口的小巴站，可以搭1-1/2/2-2號小巴，都會去到。車程約15分鐘，架車不斷上山，車冇顯示屏，完全冇頭緒邊度落車，於是我就俾幅圖隔離個阿豬媽睇，到站佢就叫我落車，我諗呢個係最好方法。哈哈。
落車行幾步就見到呢個位，嘩嘩嘩，當睇左好多次的圖片真實呈現在眼前時，感覺非常神奇夢幻，覺得自己好似走左入幅相入面！真係好靚好壯觀！又原來Running Man都曾經黎呢度取景。（呢張圖片來自U Travel，我竟然唔記得影呢個有3個人型的入口位）
甘川洞呢堆彩色屋仔其實係50年代韓國戰爭以後難民所居住的地方，在2009年經過活化計劃，將所有屋仔油上唔同顏色，再加上唔同的藝術裝置，變成一個好lovely的景點。所以甘川洞係個既有歷史價值，又有藝術色彩的地方。要留意而家仍然有好多人住係甘川洞，每間屋仔都係人地屋企，所以遊覽時請將音量收細，盡量唔好打擾到人地啊。（我覺得呢度環境好舒服，住呢度會好開心，但日日都見到有人在自己門外參觀又好似會不太好受......）
參觀甘川洞可以參照官方提供的參考路線，就可以見到大部份的藝術裝飾同壁畫。我起初都有跟住，但跟左一陣就開始亂行，仲走左去行山！！因為我一直想搵個最宏偉的視點可以睇曬整個山頭的屋仔，所以越行越上，最後就上左山頂！！但其實又唔一定係最高睇就最靚，唔同角度都有唔同感覺啊。所以我覺得遊覽甘川洞的最佳方法就係亂行，想行邊就行邊，隨時都會有驚喜！
小王子同狐狸先生都在看甘川洞的景色呢。唔知點解佢地兩個的背影有點落幕，但我又好鍾意呢個畫面。好吧陪你地一起看好了。
呢個地方真係好舒服，好悠閒，行行下會無啦啦見到好靚既裝飾或者壁畫，好有尋寶的感覺。
仲會見到好多可愛的喵星人。
仲見到櫻花添！！
除左遠望仲可以走進屋仔區的小路，從另一個角度欣賞呢個色彩繽紛的世界。行行下就行到日落。
黎呢度要預留多點時間俾自己亂行，如果只係想影下相可能一個鐘都會影完，但好似我想慢遊的話可以行兩、三個鐘，呢度仲有cafe可以坐下hea下。記住著對舒服既鞋黎啊。同埋呢度有個蓋印遊戲，入口附近有個類似遊客中心用2000won買份地圖，去曬10個指定地點蓋印，就可以換到甘川洞明信片。我沒有玩啦，因為想行得隨意一點，不想跟指定路線麻。回程就在下車位置的對面有小巴站，上返黎個幾架小巴就可以了，會去返地鐵土城站8號出口。誠意推介呢個lovely的景點給lovely的大家！
