秋天去韓國除左賞紅葉同銀杏，仲有唔可以錯過的夢幻芒草景色！香港睇芒草最出名應該係大東山，但據說上山之路難度有4粒星，並唔係普通弱質纖纖的少女（即係我）可以隨意挑戰的。首爾就唔同啦，距離市區不遠的天空公園每年10月都有一大片盛開芒草，雖然都係位於山上，不過上山之路一點都不難行，懶到盡頭甚至可以搭接駁車上山，芒草得來全不費功夫呀！係咪正先？

首先搭地鐵來到世界盃競技場站1號出口，繞過個競技場行10分鐘左右，穿過一個露天停車場，就會去到一條兩旁種滿花的天橋，前面見到有條裝飾得靚靚的木天梯！冇錯，行上呢條木天梯就會去到天空公園架啦！天梯有約300級，老老實實行上去都幾辛苦下......不過又唔可以以我作準，因為我本身體能就極差......我見隔離d阿豬媽好似行得幾輕鬆......仲有氣力撞開d阻住佢地既人......哼。我覺得《屍殺列車》由韓國人拍真係好適合，佢地個個都孔武有力，撞人又不遺餘力，我在韓國每日都只少俾人撞一次，相信黎過韓國的人都會好明白。

但我頭先都講左啦，如果懶到盡頭，天梯旁邊貼心為你準備左接駁車上山，類似高爾夫球車，盛惠2000won一程，來回3000won。但我兩程都係行天梯架！上去個程諗住一場黎到挑戰下麻，雖然中途有點後悔，不過落山個程又覺得甘辛苦都上到黎啦，落去輕鬆d既，咪行返落去囉。（說到底我還是個有一點點毅力的傢伙呀～）

一路行木天梯一路望返去山下會見到好靚的首爾城市風景，入秋時份山下的樹有齊紅黃綠3色，另外仲會見到漢江。

行完天梯以為到左？錯啦，仲要行多一段仔斜路，少少斜啦，行幾分鐘就會見到一舊石，天空公園到著！免費入場的。

基本上一行入去個公園，就已經見到無盡芒草，你絕對會俾眼前芒草嚇親，因為係多到難以想像！！！好正呀！！！今次係我第一次睇芒草，就可以睇到甘震撼的，好開心！公園超大，有源源不絕的芒草。我以為芒草好矮，但原來生得好高下，同人差唔多高，行在中間，有可能會迷路，因為周圍都係芒草，周圍都差唔多樣。

我幫大家聞過，芒草係冇味的。

天空公園冇咩特別設施，入口附近有一間類似士多的小店，路中間有d亭俾大家坐下訓下，仲有一個中央展望台，一定要上去，因為可以從高處睇到一望無際的芒草，好靚架。

每年10月天空公園都會有芒草慶典，內容不清楚，但會特別開放公園至夜晚10點，可以睇夜景！每年10月至11月就係芒草盛開的月份，在芒草慶典舉行的日子前後時期來就最好。對了，入口處仲有少量波斯菊。（很跳tone）

世界盃競技場站1號出口附近除左天空公園，其實仲有幾個公園的！走的時候經過一個小小的和平公園，有個小小的湖，剛巧天氣很好，湖水有天空倒影，超！級！靚！是韓版天空之鏡啊～想起來首爾其實好多公園，而且都好近市區，好羨慕啊，遊走首爾的公園身心好舒暢，花季景色更加優美，這也是我很喜歡首爾的其中一個原因。

天空公園
地址：首爾特別市麻浦區天空公園路95 (上岩洞)
交通：地鐵世界盃競技場站1號出口行30分鐘（連埋行天梯時間）