如果唔係來自星星的你，大家可能都唔知原來韓國人係好鍾意食炸雞配啤酒的！香港最深入民心的炸雞店應該都算係「call我」，但質素非常一般，大家都知道。而韓國有兩大連鎖炸雞店都好出名，其中Two Two炸雞就係我想推介的必食炸雞店！

話明連鎖店，Two Two炸雞有好多分店，明洞、東大門這些熱門遊客區都有，而今次食的就是在東大門的分店，離地鐵站只有幾分鐘的路程。呢間分店最勁係24小時營業，又可以外賣，真係可以隨時call佢！其他分店就通常開到凌晨3點。門口已經見到有座炸雞山，感覺好熱氣，但我鍾意。哈哈。

呢間分店有兩層，但位置唔算多，加埋得10張枱左右。店員識少少中文，溝通冇問題。好多韓國人都會食炸雞做宵夜，我11點去到都幾多人係度啤一啤同食炸雞。

炸雞有幾種口味，原味、甜醬、辣味、蔥燒同蒜味。我點左原味加辣味各半份，當然仲有啤酒啦！一份炸雞大概有12件，2-3個人食，一份價錢大約由$16000 won - $19000 won，即係港幣$115-135左右，都合理。熱辣辣的炸雞好好味啊！！先講原味，個皮好脆，炸得岩岩好，唔會炸太耐皮變硬左，而且唔會得d炸粉。至於雞肉又滑又有雞味，都幾juicy！好鍾意！！而辣味我覺得冇原味甘好食，一黎個皮加左醬點都會冇甘脆，二黎個辣醬都唔算太好食，但又蓋過埋雞味，所以會覺得食緊舊辣肉......比較之下會推介食原味，真係原汁原味呀！

雖然炸雞係幾熱氣，不過Two Two炸雞會用椰菜絲做伴菜，可以減輕油膩，俾藉口自己食多幾舊......仲有配埋啤酒，又可以清下熱氣，又再食多幾舊......

然後我第二日仲要再去多次買炸雞外賣返酒店做宵夜......外賣唔會有椰菜絲，但有醃蘿蔔，都可以減輕罪疚感。（真的可以嗎......）今次只係買原味，但我覺得都係堂食好味d，炸雞一定要最熱辣辣、最熱氣個時食架！！（堅定）雖然Two Two炸雞都有做外賣，可以送埋去你酒店，好方便，但都係建議自己去食開心d。我諗係香港call鄭嘉穎送黎既炸雞都一定係冇甘好食架！

講開又講，一開始個時話韓國有兩大連鎖炸雞店都好出名，另一間叫橋村炸雞，本身都想試，但去到東大門分店個時，職員話唔做堂食只可以外賣（但明明有位架喎），都唔緊要，佢話外賣要等40分鐘！！而且佢面色非常唔友善，擺出一副完全唔稀罕做你生意，食就等唔食就過主的樣子，有骨氣的少女當然係頭也不回地走，所以唔知好唔好食。雖然Two Two炸雞既阿豬媽們都唔算親切，略帶不耐煩瞼色（做炸雞店有這麼大壓力嗎......），但一定比橋村好啦。有人可以告訴我橋村炸雞好食嗎？（我有骨氣但也很好奇）

Two Two炸雞東大門店
交通：東大門歷史文化公園站12號出口，向左直行3分鐘
營業時間：24小時（其他分店開到凌晨3點）

是次韓國之旅由Wi-fly 提供上網贊助。