少女旅行日記

釜山

[釜山] 隱秘好味道 釜山烤豬肋骨 嫩滑超多汁食不停口

釜山值得推介的野食不多,唯獨呢間在地鐵西面站,樂天百貨後面的釜山烤豬肋骨令我念念不忘,好好食!(呢篇應該係我唯一一篇釜山餐廳推介)呢間餐廳好地道,現場所見都是韓國食客,唔見有遊客,menu又得韓文,職員亦只識韓文......溝通有少少困難,唔係好知佢講咩,不過我已經掌握到最重要的資訊可以同大家分享,放心!
呢間餐廳主打烤豬肋骨,menu第一部份就見到有4種味的烤豬肋骨,第一種係鹽烤味,之後3隻其實都係BBQ味,只係辣的程度不同,分唔辣、中辣同大辣,我揀左唔辣。menu上寫的價錢係每180g計,所有口味都一樣係8000won,但原來最少係要點3份,即係540g,24000won。3份有幾多呢?就係大概15舊烤豬肋骨,2個人食的話岩岩好。(講緊要再叫其他野食喎)
韓國餐廳最大特色就係超多前菜,呢間都冇例外,點完餐就會火速送上一堆野。有紫菜湯、有沙律、配菜,左邊有碟牛油粟米好好食!!雖然係配菜但都好用心,用鐵板上的,上個時仲係燒緊,熱辣辣好正!!
而主角BBQ味烤豬肋骨出場啦!其實豬肋骨已經預先燒好,侍應拎出黎放上爐個下已經話可以食得,唔駛再自己慢慢燒。不過都係建議大家可以由佢再燒多陣先食,醬汁更入味!豬肋骨熱辣辣,餐廳好貼心預備左手套俾大家,仲係勞工手套加膠手套,可以放心用手拎住黎食!非常鍾意呢個安排,夠豪邁,哈哈!隔住手套都感受到豬肋骨好熱,真係好香好好食!賣相已經非常唔錯,食落醬汁好惹味,又夠juicy,豬肋骨肉質好嫩滑,會不自覺食完一舊又極速放另一舊入口,食到停唔到,一下就食曬!隔對枱對韓國情食完一round仲黎多round添!我後來都後悔冇叫多round呀嗚嗚嗚......
點解既點解既點解既?(吳若希腔)就係因為我仲叫左個海鮮煎餅,所以就冇再叫豬肋骨。餐廳除左豬肋骨,仲有幾樣其他野食,但都真係得個幾樣,唔多選擇。呢個海鮮煎餅賣相不錯,因為好多料,但食落就......一般。主要係我唔鍾意食蔥,但煎餅好多好多大大條的蔥!!!整走曬d蔥之後都唔係好感覺到食左乜野,而且好貴,成15000won,即係港幣100蚊!雖然都幾大份,但真係唔太推薦。
後來諗諗下,其實應該加白飯,豬肋骨送飯一定好正!!大家可以試下~下次再去釜山我都一定會回來啊~
釜山烤豬肋骨(부산쪽쪽갈비)地址:釜山鎮區中央大路691街32交通:地鐵西面站7號出口樂天百貨後面條街營業時間:16:00 - 02:00
貼心少女為大家送上地圖:
是次韓國之旅由Wi-fly常通提供pocket wifi贊助。

更多釜山相關文章

更多韓國相關文章