好多男人聽到首爾，都會臉帶不屑，再冷冷拋下一句：「鬼地方」。少女可以理解對於男人黎講，首爾係幾悶同埋幾唔岩玩既。某程度上，我甚至覺得首爾根本係一個為所有少女而存在既國度，遊首爾有好多樂趣都係同好姊姊一齊去先會感受得到，男人係唔明架喇！！！以下4大同好姊妹去首爾先會明白既樂趣，由少女onni為你提供。

一 潮流教主瘋狂買衫試衫
由明洞買到去梨大弘大，再落埋江南區，走返轉地下街，夜晚掃埋東大門行天光，用錢換手上一袋二袋，完全唔覺得累，得好姊妹先可以做到！一日互問100次「呢件靚唔靚」、「個袋抵唔抵」、「對鞋買唔買好」，好姊妹先有心機認真俾意見，齊齊買，齊齊開開心心燒錢。返到酒店仲可以一齊試新買既衫，「喂呢個look得喎」、「呢條裙正喎邊間買架」、「你個件都唔錯喎衰鬼」成班以為自己係top model......好kai先。

二 美容達人瘋狂敷mask
首爾最多除左衫，就一定係mask。下畫每人買幾塊，夜晚返酒店一齊敷，一人試一種，我試美白你試保濕佢試蝸牛，15分鐘即時有真人試用包膠，唔好用就大叫一聲「垃圾」，好用就聽日一齊去大手掃貨。有次同姊妹們一齊試唇mask，見到大家個咀貼住大大個紅色唇mask勁騎尼，笑到癲左......要冷靜落黎先可以繼續敷。

三 太陽的少女瘋狂睇oppa
如果同班一樣中曬韓劇毒既好姊妹去首爾真係不得了，我睇宋仲基你睇李敏鎬佢睇金秀賢，同oppa廣告紙牌影相呢d柒事真係唔係個個肯陪你做......仲有一堆韓劇景點逐個捉，鬥快講呢度係邊套韓劇既拍攝地，邊一幕又係邊個位拍，套劇個男主角有幾正。個個女主角上身，媽，呢班少女真係好毒呀！

四 越肥越愛瘋狂增肥
韓國野真係好好食。醬油蟹、韓燒、炸雞、石頭飯、炒辣雞、海鮮、芝士部隊鍋、炒年糕、韓式壽司、韓牛、Isaac三文治、香蕉奶（呢個我自己私心加）......同好姊姊去首爾可以不顧儀態，只要抱住「減肥是明天的事」呢個偉大信念，放肆狂食，餐餐捧住個肚腩仔返酒店，一個旅程食盡成個首爾既……美食。

如果搵到個肯陪你去首爾既男人係咪好好呢？如果你男人真心享受陪你做以上4樣野就的確係，你要好好捉實佢。但如果佢只係純粹好心陪你呢？唔需要啦，首爾真係好姊妹限定。乖啦，唔好迫你男人拎住一大堆戰利品仲要幫你同oppa們影相啦，咪俾佢自由幾日囉，你同好姊妹就可以去oppa國放縱幾日啦！

‪#‎ihope宋慧喬willjoinus‬