少女旅行日記

澳門 其他合作

[澳門] 金沙城中心假日酒店 夏日夢工場體驗 與史力加、荒失失奇兵們共聚早餐

一直都幾鍾意澳門呢個地方,一來近啦,一個鐘船程好快;二來有勁多好野食,葡撻豬扒包魚翅麵水蟹粥木糠布甸雪糕三文治好多好多;三來有好多葡式建築,係影相好地方;四來仲有好多靚酒店、大型度假村,沒有最豪華只有更豪華;五來有機會發達......(好似係)所以我一年最少黎澳門一次,兩日一夜週末鬆一鬆好開心。
今次又黎到澳門,入住金沙城中心的假日酒店,非常值得推介!!乘搭金光飛航去到氹仔碼頭,一出碼頭就會見到黃色的酒店接駁車,免費架,大約10分鐘就到金沙城中心。澳門地方細細,但酒店總係好大型,大到會迷路個隻。簡單介紹一下先,金沙城中心係一個大型度假村,旗下有3間飲酒店,分別係假日酒店(Holiday Inn)、康萊德酒店(Conrad)同喜來登酒店(Sheraton)。而據我所知仲有一間新酒店將會落成。大家好熟悉的威尼斯人同四季酒店都屬於同一集團,就係對面,行過去約5分鐘。
金沙城中心除左有3間酒店,仲有個大型商場,有好多好多名店同餐廳,成個又一城甘!!另外仲有賭場同一個以夢工場卡通做主題的花園廣場禦桃源。
3間酒店各自有自己既check in counter,假日酒店的counter好大,同時間有10幾個職員做野,都幾快手。
上房啦!!今次住的係高級客房,我幾鍾意間房的設計,好明亮同好新淨!張床好大好舒服,勁好訓,訓到唔想起身!!重點係第一次見到枕頭有分軟同硬,任君選擇,好周到啊!!
浴室都一樣好光猛,而且有浴缸又有淋浴間,空間都幾大。盥洗用品齊全,我想讚下個風筒,好大風,我最鍾意!而最特別係見到有個音量控制,原來天花板有個擴音器,房間既電視聲可以係浴室播,可以一路浸浴一路聽下電視聲,正呀喂。
我覺得間房好乾淨,成個感覺都好舒服好relax。雪櫃有好多野飲,mini bar仲有杯麵同朱古力,不過要收費架。
睇完間房,再睇下係酒店4樓的泳池同健身室。假日酒店個室外泳池區好正,有成6個泳池,仲有3個按摩池!!其中一個係恆溫泳池,所以冬天都可以游水。因為實在太多泳池,所以唔會好多人迫埋係同一個池,有時甚至可以獨霸一個池,好開心啊~想邊曬太陽邊飲野就可以去pool side bar。而對唔太識游水既少女黎講,最正係有免費借用的浮板,哈哈。泳池係望威尼斯人景架。
健身室我冇用,不過入去睇左一下,都幾大同埋幾多機,仲有桑拿浴室。
重點來了!!大家有睇史力加、荒失失奇兵、功夫熊貓嗎?而家金沙城中心舉辦緊「體驗夢工場」活動,除左頭先提及的夢工場花園廣場外,仲有好多同夢工場有關的活動。其中一個推介就係同夢工場卡通人物一齊食早餐!呢個係我參與過最歡欣的酒店早餐啊!!首先個場地佈置已經靚到令人嘩一聲!早餐場地在假日酒店4樓的烏魯木齊宴會廳,個場好大,成個場都充滿七彩繽紛的夢工場裝飾,一路播住幾套卡通電影的主題曲,派對氣氛非常濃厚!
早餐係自助形式,食物選擇非常多,中式西式都有,每個種類都有好多選擇,蛋、包、粥、麵、點心、穀物、乳酪等等都有好多款可以揀,多到冇可能樣樣都食到。比較特別係有茶葉蛋、咖哩薄餅、粥檔有油炸鬼,仲有卡通造型的食物包括功夫熊貓阿寶的豆沙包同薑餅人!好打耳~
當你仲煩惱緊食咩好的時候,一班夢工場卡通就逐一出場啦!!佢地會先係台上跳下舞,之後會落台同大家影相。基本上佢地每一枱都會去,同曬全場人影相先會走既,所以唔駛驚影唔到架。大家食住等佢地行過黎就得,佢地好活潑,會同大家互動,無論小朋友定大人見到佢地都好開心,少女都好開心呀~~我最鍾意係荒失失奇兵的獅子阿力啊!!(抱)
成個早餐的氣氛都好開心,係其他酒店從未體驗過的,所以非常推介大家一齊參與啊!而除左早餐,都仲有其他機會見到呢班卡通人物,包括每日4點在2樓商場的大巡遊同功夫熊貓學堂等。佢地仲會不定時出現在花園廣場禦桃源同大家影相,要捕捉佢地唔難啊。
假日酒店係金沙城中心3間酒店中最平,我覺得好抵住!好適合一家大細去玩,而家住宿套票只需$1398起,套票包括雙人入住高級大床客房、雙人「體驗夢工場」動畫明星早餐、澳門幣300蚊餐飲購物券同「體驗夢工場」毛絨玩具一隻,即刻上booking.com預訂啦!優惠到9月30日咋!澳門金沙城中心假日酒店
訂房網址: http://www.booking.com/hotel/mo/holiday-inn-macao-cotai-central.en-gb.html
(本文與booking.com合作)

更多澳門相關文章

更多其他合作相關文章

更多其他地區相關文章

更多專欄訪問相關文章