少女旅行日記

其他合作

[郵輪] 全球第4大郵輪 海洋量子號首度來港 好玩海上大型度假村初體驗

今個6月皇家加勒比國際郵輪旗下的海洋量子號(Quantum of the Seas) 首度來港,停泊啟德郵輪碼頭,呢架全球第4大的郵輪亦係香港開埠以黎泊岸既最大型郵輪,霸氣十足!!少女非常榮幸可以獲邀上船參觀,難得可以上船,梗係要好好同大家詳細報告一下船上環境同設施啦,等大家一齊率先了解呢架巨型郵輪!上船喇喂~
咪住,上船之前先係啟德郵輪碼頭睇睇架郵輪有幾巨型先!離遠見到已經覺得好震撼,霸氣就是這樣來的~參觀當日天氣仲非常好,藍天白雲下在船上看海景仲靚呀!俾少少基本資料大家,海洋量子號全長1100呎,有3個標準籃球場甘闊,總共16層,可以載到4000幾人,客房有2000幾間,仲有好多餐飲及娛樂設施,係咪睇到呢到已經好心急想知究竟入面係點呢?今次真係上船啦!
呢日參觀活動第一件事係食午餐,所以都會先介紹船上餐飲部份。如果大家參加郵輪旅遊,套票價錢係包食包住既,船上有幾間免費餐廳提供任食服務,其中仲有24小時開放,隨時隨地都可以食唔停!你以為免費就唔方好食?錯喇,今次少女試左其中一間免費餐廳,叫Chic,食西餐,仲有齊頭盤主菜甜品,選擇眾多,質素絕對比得上出面有格調既高級西餐廳,平時食起碼每位$300以上吧。所以如果真係上郵輪住返幾日,得閒路過就可以免費入黎食,都幾開心架......忽然掛住個芒果奶凍,超滑!!
除左免費餐廳外,船上仲有好多好多各具特色既收費餐廳,可以品嚐世界各地的料理,扒房、酒吧、小食店、蛋糕店都有,間間都好精緻,間間都好想試!參觀其間每間餐廳都有提供小食俾大家試下,真係全部都好高質,上到海洋量子號餐餐都有好野食!
餐廳中有兩間我特別推介,一間係以Alice in the Wonderland做主題的份子料理餐廳,裝修設計既華麗又夢幻,係少女們大愛既風格。個menu仲好得意,拎上手係一張白紙,要用水掃幾下先會見到字的!!神奇!!
而另一間係two 70,呢間餐廳可以見到海景,好大好靚,仲會有live band表演,成個感覺好舒服又好有味道,好鍾意!
講完食呢,就梗係玩啦!海洋量子號有好多新奇好玩的娛樂設施,係你完全冇諗過連郵輪都會玩到!最吸引的係模擬甲板跳傘 RipCord by iFLY,玩家可以在儀器裡感受無重力狀態,飛下飛下好刺激!另外仲有模擬衝浪器FlowRider,教練好有型,可以在滑板上停留好耐仲玩埋自拍,可以教我衝浪嗎?仲有攀石牆呀,呢3項設施都係郵輪頂層露天環境下玩,一路玩一路望住個海太正了吧~郵輪仲有一大賣點,就係設有可以將乘客吊出船外,在離海面90米高空觀景既North Star吊臂艙。好.想.上.去!(但參觀那天不開放啊......)
室內都有好多野玩,包括海上最大的室內運動場SeaPlex,裡面有全球首創的海上碰碰車,勁懷舊!仲有其他球類活動。室內亦設有賭場、遊戲機中心、購物大道、spa場地、歌劇表演舞台等等,滿足不同類型的遊客!
泳池的部份也是少女很喜歡的一環。船上室內外都設有泳池,仲有水力按摩池。就算係室內泳池,都有玻璃天幕,感覺跟室外也差不多,可以在藍天白雲下游水同浸水力按摩池超寫意開心。泳池附近梗係唔少得pool side bar啦,仲有自助雪糕機添!!
另一邊仲有日光浴池,設計得像溫室一樣,環境美好得太誇張了吧~~
而少女最欣賞係郵輪好有空間感,周圍都有好多沙灘椅同梳化俾你休息同欣賞海景,環境舒適到隨時可以訓著,超寫意der~郵輪真係遠離煩擾的好選擇。從船上睇香港海景好靚啊!!
參觀完海洋量子號之後,我對郵輪的印象大大改觀!以前總覺得郵輪好悶又好貴,係退休人士之選。但原來而家郵輪已經好照顧到少男少女的需要,有好多新奇野玩,唔駛怕悶!有讀者問價錢,我睇過一個大約5日的亞洲之旅,大概$5000起。一個價錢包住包食包交通,其實計返又唔貴喎!其實住兩晚大型resort都差唔多價錢,甘坐郵輪仲抵啊~我要將海洋量子號的海上假期放在我wish list裡,快快來一趟郵輪之旅!!有人要加入一齊去歎世界嗎?
皇家加勒比國際遊輪
網址:http://www.royalcaribbean.com.hk/

更多其他合作相關文章

更多專欄訪問相關文章