搜索

少女旅行日記

六年前後

你地有冇試過一大班人去旅行?六年前少女第一次去台灣係同五個中學好朋友一齊去的。 當年在台灣做過的柒事到今時今日都經常成為我地幾個飯聚時的笑話。 六年期間,經常都有人問:幾時再六個一齊去旅行呀?係咪去架?去邊呀?幾時呀?但每次都總有人話:今個月好忙呀、下個月我同另一班朋友去呀、再下個月冇假呀、再再下個月轉工呀......今年唔得出年唔得後年唔得無限loop。 終於,在一個互相威迫利誘堅決唔准反口晨早幫你買埋機票理得你冇假定唔撈一個都不能少一定要去到的情況下, 六年後我地六個再次一齊去旅行,去一個大家都未去過的地方,就好似當年大家都第一次去台灣,抱住新鮮感一齊去探索越南峴港。 旅程中唔會出現「妖我黎過啦呢度冇野睇架!」 或者「下我唔想去囉呢間食過唔好食喎!」 總之要柒就一齊柒,有伏齊齊中,務求彰顯一班人去旅行的偉大。
 六年前我地係高雄影左上面個張相,其中一個人負責揸機所以只係影左五個人(好心柒少陣個時求其叫路人影啦少左個人喇係咪衰呢),六年後我地係峴港影左下面個張,終於齊人啦。 (相擁痛哭場面感人) 相信今次旅程遇到的膠人膠事又可以笑幾年。 我知大家出黎做野之後,要約到一班人去旅行好難,但係有心約係一定會約到架。 信我。