唔知幾時開始，每隔幾日就會見到「不搶後悔！讓全港700萬人震驚的特價機票」消息，「$1機票」、「買去程送回程」、「一人價錢二人同行」、「開倉24小時」、「早鳥優惠」......騙徒手法層出不窮，目的就係要搶你錢。明明你本身唔特別想去某個地方，都會因為個價錢而心思思籮籮攣。然後一整天就會陷入苦戰中。

首先，你要抱住一個懇求航空公司賺你錢的心態不停refresh佢個網直到入到為止。然後你就要運用100%運氣用最短時間搵到個最低價格，搵極都搵唔到你就輸了，可以先行退場。

當你終於搵到個超級震撼價，遊戲繼續。你會一邊咒罵點解個航班時間咁差要晚去早返前後蝕左兩日一邊已經周圍問緊有冇frd子陪你一齊去旅行。同一時間你再搜查下如果早一日去幾錢、遲一班機返又加幾多、如果分開買兩張單程會唔會抵少少、另一間廉航又賣緊幾多、加埋稅同行李又好似唔係太平......睇到頭都暈的時候你班frd子開始覆d「嘩抵喎」、「正呀喂」、「真係好平」之類的廢話，你本來想覆「大佬你地傻的嗎唔係平我點會send出黎呀？！」，但因為時間關係而改為「go ng go？」

漫長等待後通常有兩個結果：
一。「好平不過冇假」、「等佢下次再平d先啦」、「呢段時間唔得喎」......OK forget it。
二。「去呀去呀等我問下老細放唔放人先」、「去呀去呀不過早一日去得唔得？」、「去呀去呀不過時間有冇好少少架？」到真係真係真係確定去的時候，Sor9ly優惠已經售完。

終於從平價去旅行的夢中回過神來，發現原來已經放lunch，成個朝早0生產力之餘，旅行亦去唔成，到頭來一場空。

但親愛的，不要緊，別灰心，因為明天又會有新的機票優惠，以上的事情會再無限重複。希望在明天，想旅行的心never die。

睇＿住呀！又有平機票喇！