搜索

少女旅行日記

活在當下的性格是怎樣鍊成的?

首先我必須承認我係睇TVB大既。以前每晚三線劇集我都睇足咁濟。其實都冇咩好否認丫,以前d劇集真係好睇麻。而經過那些年,我在TVB學到的最重要人生大道理係 - 人係隨時會死既。TVB幾乎每套戲都一定有人會死,無論角色係醫生、警察、律師、賊、學生、甚至路人;無論身份係婆婆、老豆、阿媽、家姐、前男友、現任女友、舊同事、朋友、甚至朋友個姑姐,都會無啦啦撞車、生cancer、心臟病發、俾仇家打死、俾賊殺死、俾老豆推落樓、俾警察射死......(下刪一萬個死法)點死都好啦,總之任何人都唔會倖免。唔關你有冇錢、有冇女、年齡、學歷、性格、樣貌事,流克面前人人平等。

「人係隨時會死既」思想深深植入我腦海中。近幾年我冇再睇TVB,但現實生活比TVB更真實、更直接、更殘酷去強化呢個想法。活了二十多年,話長唔長,話短唔短,但身邊的無常故事都有唔少。中學老師、識於微時的朋友、親戚、朋友的家人......呢幾年大家睇好多「今日RIP」,唔理d人一窩蜂去死左既人個Facebook留低一句「RIP:(」有冇意義,反正Facebook上冇意義既言語多的是,比較起上黎「RIP:(」未算最廢,起碼可以不停提醒大家無論在TVB的死人世界,還是我地真正生活的現實世界,人係真係隨時會死既。

妖,咁多人死唔見你死。雖然知道人係隨時會死,但我地總覺得唔會係我死先囉,係都你先啦,有排都未到我囉。我地最鍾意睇到人地遇上不幸時懶感慨拋低一句:人生無常,珍惜眼前人!然後繼續過如常日子,每日返工等放工、放工等放假、放假訓足一日、得閒發下阿媽脾氣、悶到口臭先開口同阿爸講兩句廢話、對世界漠不關心。到真係身邊人有事或者自己有事,就問why me?然後流克會反問你:Why not you?反正你日日on99生勾勾唔理人之餘自己都冇特別野要做架啦。如果要做,你一早做左啦。

好多人鍾意講將來。「第時,等我發達,我就乜乜柒柒」、「而家唔得呀遲下等我退休先啦」、「我話既,將來我一定可以點點點」、「我唔係唔做,係未做」乜都話第時、遲d、下次先.....你估真係好似張家輝咁話「你而家冇,將來就會有」?我欣賞你為將來打拼架,叻仔黎架你一定係,但你肯唔肯定你有將來?又其實,你所講既將來係咪真係要遙遠既將來先做到而家一定做唔到?你要上太空唱歌?你要住豪宅?你要做一個一人一票選出黎既特首?嗯,咁真係有難度既,你繼努力啦,你加油呀唔好死,我祝福你。但我地做人不妨誠實一點,絕大部份人想做的事其實都只係平凡簡單小願望,可能實現起黎會有所犧牲,但通常都唔係乜野震驚所有人的世紀大宏願,根本唔需要將來先做到,只係你太多無聊藉口一拖再拖。你欠缺既唔係時間,係決心。

如果想開心,為什麼需要等?有真心想做的事,你一秒都唔會想等,當下就要即刻開始,就算唔係即刻做到,都已經開始籌備、計劃。往事如煙,改變唔到;未來太遠,控制不了。我地擁有的只有當下,你睇緊呢篇文的當下。我地控制唔到自己個名幾時出現在死亡筆記上,但趁我地仲可以感受當下的溫度同空氣個陣,做你想做既事、去你想去既地方、見你想見既人,一秒都唔好等。唔好覺得咩都會有下次,亦唔好浪費時間在不值得的事和人身上,因為我地浪費唔起。而家開始珍惜你擁有既日子,如果我地都有將來,就會有好多有趣故事與見聞可以一齊分享。