少女旅行日記

北海道

[北海道] 夏日北海道玩樂之旅 豪華住宿享受 星野渡假村 客房及餐廳篇

初訪北海道,少女入住了日本非常著名的渡假村品牌-星野渡假村(Hoshino Tomamu Resort)。星野集團在日本多個地市都有興建渡假村,口碑極好,質素絕對有保證。而北海道的星野渡假村除了提供一貫優質的住宿服務外,還有令遊客慕名而來的夏日雲海景觀、水之教堂、冬天滑雪場等北海道皇牌景點。少女親身住過之後都非常滿意,有好多好多想同大家推介!
北海道星野渡假村離札幌新千歲機場約一個半鐘車程,由機場出發可以坐JR,都可以預訂酒店專車服務。渡假村佔地超超超廣,住宿、餐飲、玩樂同觀景設施十分豐富,可以玩足至少4日3夜。今次先介紹住宿同餐飲部份,下一篇就會介紹玩樂景點。
渡假村有兩間酒店,一間係The Tower,兩座彩色高樓成為渡假村地標,走年輕、活力、經濟路線;另一間係Risonare,走高檔家庭旅行路線,每層只有4間房,每間房面積有成100平方米,有廳有房,非常適合一家人齊齊渡假。
今次少女入住的就係Risonare,一開門已經「嘩」一聲,因為真係好大!客房風格簡約得黎又有種好舒適溫馨的感覺,設備好齊全。而渡假村四周都係森林,所以從房間睇到的景觀都係一片翠綠,令人好放鬆。
客房最正係浴室有個大按摩浴池,大到可以幾個人一齊浸都得,望住玻璃窗外的青蔥森林景色浸浴超寫意!而 Jacuzzi 隔離係個獨立桑拿房,日頭玩到累夜晚返房焗完桑拿再浸浴,疲勞盡消,真係人生一大享受呀!浴室空間好大,除左Jacuzzi同桑拿房,仲有淋浴間同兩個洗臉盤,洗滌用品一應俱全。廁所在另外一邊,都有一個洗臉盤,所以成間房總共有3個洗臉盤,一家人住都唔駛爭住用。
浴室隔離係睡房,有兩張大雙人床,床舖軟硬度適中,超好訓!仲有兩張小梳化,整個客房設計都令人覺得好寫意,如果我屋企係甘樣我一定會好痴家......哈哈。
Risonare地下除左check in counter之外,有個好大的休息空間,中間有一個火爐,夜晚真係會點火,大家可以圍住火爐傾偈。仲有一間便利店,可以買零食、飲品、北海道紀念品等等。
走出室外,係一個好清幽的花園,非常適合散散步,呼吸新鮮空氣。
特別推介地下一間咖啡書店,果汁同咖啡都免費,仲可以借書返房睇。咖啡書店環境好舒適寫意,文青們必定好喜愛。
介紹完房間,就到左少女最喜愛的餐飲部份啦。講到餐飲就勁喇,渡假村有超過20間餐廳!!!一日食3餐都可以食足一個禮拜,絕無誇張!有幾間係我心水推介,首先第一間係森林餐廳Nininupuri,餐廳真的在森林裡面,全落地玻璃窗設計令你猶如置身森林裡用餐,日間被柔和陽光和一片青蔥樹林包圍,夜晚加上燈光效果又是另一種夢幻,無論日夜景色都超級超級美!
森林餐廳提供自助早餐及晚餐,食物選擇很多,各國菜式到地道日本料理也有,質素都不錯。自助晚餐的價錢約港幣200多一位,都幾抵。
第2間推介餐廳係HAL,想食到北海道最新鮮當造的食材就一定要黎呢間餐廳啦!HAL都一樣提供自助早餐及晚餐,但食物同森林餐廳有點不同,HAL以北海道時令海鮮同刺身做主打,特別有一個海鮮角落,食材會按季節轉換,保證大家可以食到最新鮮最地道的北海道特色海鮮!以食物質素來說,HAL真的超高水準,好味的實在太多啦,大推!!!
HAL的甜品都好好食,其中最特別係雲海雪糕,大家可以係牛奶軟雪糕上加唔同配料同醬汁,最後加一舊好似雲一樣的綿花糖,就大功告成啦!北海道的牛奶同雪糕都係無敵地香滑,一定唔會令大家失望!
渡假村裡有一條美食街Forsera Mall,聚集多間不同特色的餐廳,選擇很多,而第3間令少女胃口大滿足的係Forsera Mall裡的湯咖哩餐廳旅々らっきょ。佢係一間小木屋設計,而湯咖哩係北海道名物,由多種素材同25種香料熬煮8小時而成,大家可以揀不同主菜同咖哩辣度,貪心少女揀左綜合,即係咩都有的雜錦,有海鮮有豚肉有雞脾,用料好豐富,湯咖哩好香濃,好適合拌飯,好好味啊!
其實作為一個吃貨,少女食既又點只甘少......我仲試左名為後藤商店的居酒屋、走清新健康路線的Green Kitchen等等,都好好食架,大家有時間真係可以逐間試呀!
北海道星野渡假村 4 日 2 夜套票 (每位$4,888+)
詳情:PAM Holidays 北海道星野渡假村套票
去北海道搭邊間航空公司最抵?睇下我的心水推介啦![北海道] 平價飛北海道不是夢 香草航空Vanilla Air飛航體驗 一票玩盡東京、北海道

更多北海道相關文章

更多日本相關文章