搜索

少女旅行日記

何妨迷路看風光

你去旅行會plan行程嗎?我有個朋友,佢每次去旅行都有一份釘裝好的A4紙行程,每次睇到我都覺得大開眼界。A4紙上面資料非常詳細,文字部份包括每日行程,內容有:幾點起身、去邊度食早、午、晚三餐、幾點出發去邊個景點、景點地址及開放時間與入場費、搭車搭幾耐、幾點到邊度、幾點要去下一個景點、行街要行邊幾個牌子、手信名單。當然,一份稱職的行程亦都唔少得圖像部份,包括所有景點同餐廳地圖、地鐵路線圖、交通公具時間表、上車位置圖、手信相、連天氣預測都有。我幾乎以為再睇落去會有手信價格比較棒形圖、每日開支預算圓形圖同降雨機率折線圖。如果呢份名為「5日6夜超充實包冇閃失想盪失路都幾難大阪之旅計劃書」係用黎參加行程設計比賽的話,我深信輸既機會係零。又如果呢份係旅行社用黎sell客的行程,相信都係會成功的,比旅行團更詳細的行程喎,直頭要升職加人工俾你啦。但呢份只係一份居家自用的行程,我想問你其實搞乜鳩?

你係咪好鍾意玩ocamp?「好,我地準時黎到第一個check point清水寺喇,睇下而家要我地做乜先!哦,要去個間和服店租套和服再去清水寺自拍100張。」「喂快d喇夠鐘去第二個check point伏見稻荷,我地得半個鐘咋下,要行曬所有鳥居。」「黎到心齋橋,我地要食到個間半熟芝士蛋糕;之後再去藥妝店買曬份行程上面所有手信,唔好浪費時間喇,快!」旅行去到玩ocamp咁,你攰唔攰?既然唔係玩ocamp,又唔係要做task,時間表還重要嗎?

你係咪真係好驚迷路?「我都係唔想行錯路浪費時間搵路咋旅行時間好寶貴架。」有想去的地方,搵定地圖都岩既,唔係點去?但駛唔駛每樣野都咁精確?有種人真係好怕行錯路,好想所有野都根據佢安排好的進行,唔接受任何差池,覺得everything under control就perfect池。一直循規蹈矩,走在正確的道路上,時間節省左,睇到既風景卻更少。呢條直路最快到達目的地,但其實錯過左轉角個間精緻的本土設計小店,比你原本想去的擠擁景點更有代表性。呢間餐廳原來今日休息,好失望咩?唔係你點會知其實隔離個間人少少仲好食,只不過佢冇出現在旅遊書上,得本地人先識食所以冇人排隊。唔識路又有咩好怕?路在口邊,俾機會由當地人帶路,聽當地人親自介紹,比你在網上拼湊出來的資料來得更有意思。沒有非去不可的限制,才有閒暇找到更值得看的。

你知道旅行真正寶貴的是什麼嗎?就是發掘一切未知的新鮮事物。迷路正正是其中一個方法。所有野都在掌握之中,好玩嗎?你都預設了整個行程,早已記熟了所有景點的資料和相片,還有驚喜嗎?在香港我們每日都過著刻板重覆的生活,一樣多人的地鐵、一樣覆唔完的unread email、一樣討厭的老闆,你未行到返公司都已經可以預知每日將會發生咩事,你還未受夠嗎?你的人生就只懂跟住計劃進行嗎?放下你手上厚甸甸的行程,在路上放任隨意發掘,你先會搵到屬於你自己的私房景點,睇到其他人睇唔到的美好風景。我們總有迷路的時候,與其花時間驚惶失措急住搵出口,不如藉呢個機會細看平日從沒留意過的一事一物,你甚至會驚訝地發現,其實本來條路先係錯。個份厚過旅遊書的行程,扔鳩左佢啦。